28 April, 2020

Вонредна Критична маса #83: Одделно, а заедно. За простор за здравје!

Датум: среда, 29.04.2020
Рута: секој своја
Место:
улиците на Скопје
Време:
секој по свое, од 5:00 до 19:00

--------------------------------------------------------------------
Facebook настан: линк
Отворено писмо до надлежните “ПРОСТОР АНТИ КОРОНА“: линк  

 --------------------------------------------------------------------
Facebook event cover

Facebook cover 

Масовните собирања каква што е Критична маса, разбирливо, во периодов на пандемија не се дозволени.
Но возењето точак, не само што е дозволено, туку е и препорачано за одржување на имунитетот, расположението, здравјето.
(Точакот е и најдобра алтернатива за дел од корисниците на јавниот превоз за да ги избегнат гужвите, но и на автомобилите, за да направат нешто за своето здравје.)
Затоа, дојдовме до идеја оваа последна среда сепак да ја одбележиме така што ќе поттикнеме возење точак одделно, а сепак за заедничка цел:
- Оние кои одите на работа, отидете на точак.
- Пазарењето завршете го на точак.
- Дневната минимална физичка активност направете ја на точак.
- Кликнете attending на овој настан во знак на поддршка на нашите барања за #ПросторАнтиКорона испратени заедно со уште 41 организација до надлежните институции:
http://natochak.blogspot.com/2020/04/blog-post.html

Потоа:
- Ако имате идеја, можете да ни испратите предлог за пешачки или велосипедски простор кој треба да се прошири или воведе кај што го нема.
Каде недостига простор за одржување дистанца? Кој е вашиот #ПросторАнтиКорона?
- Ако немате конкретен предлог, можете да ни испратите едноставна фотографија или видео од вашето возење во среда.

Ќе возиме ОДДЕЛНО, по различни рути, во различни делови од градот, во различни термини, но ќе креираме ЗАЕДНО поинаква Критична маса.
***
Пандемијата со Коронавирусот откри колкав простор од нашите градови сме им посветиле на автомобилите, за движење и паркирање, а сме оставиле трошки за пешачкиот и велосипедскиот сообраќај, поточно за просторот кој го помага здравјето.
Прераспределбата на уличниот простор може да се направи кон подобро, не е ракетна наука, туку е прашање на политичка волја. И оваа криза е огромен тест и огромна шанса. Многу градови сериозно го сфатија моментот и воведуваат привремени и/или проширени пешачки и велосипедски патеки на сметка на коловозот.
Дали во овој период, порадо би им го дале уличниот простор на ретките автомобили да ги надминуваат брзинските ограничувања и да предизвикуваат опасност по безбедноста? Или би им го дале на жителите на соседствата да пешачат и возат точак на дистанца што е од бенефит за своето и јавното здравје?
Изборот се чини логичен.
Тука ќе видиме дали во Скопје и останатите градови има согледување колку сообраќајот влијае на јавното здравје и колку надлежните реално се грижат за јавното здравје.
Да ја израмниме и автомобилската крива преку #ПросторАнтиКорона, возможно е и пожелно е.
Си мавкаме од дистанца во среда на скопските улици!

Ѕрн - ѕрн! 

*Секој вози одговорно, со грижа за себе и за другите

*На социјалните мрежи ги користиме хаштазите: #ПросторАнтиКорона и #ПросторЗаЗдравје

22 April, 2020

Отворено писмо “Простор анти корона“

На заедничка иницијатива на НаТочак (неформално здружение за урбан велосипедизам) и Здружение на граѓани Одржливи иницијативи, како и со поддршка од 40 формални и неформални организации (наброени подолу), денес беше испратено отворено писмо со наслов “Простор анти корона“ до надлежните институции и медиумите. 
Содржината ја има во продолжение.
Поради итноста на материјата го испративме овој допис со досега потврдените организации, но листата на организации кои може да дадат поддршка е отворена.
По некоја случајност, денеска е 22 април, Ден на планетата Земја и темата за оваа година е „Акција за климата“. Климатската криза е исто така тековна криза која допрва ќе зема замав и за која овие мерки се исто така соодветни.



пример за предлог-интервенција од Милано

Примерите од другите градови низ светот можете да ги видите под хаштагот #ПросторАнтиКорона (Facebook) и #ПросторАнтиКорона (Twitter).
 
---------------------------
Отворено писмо 
“Простор анти корона“

Следејќи ја ситуација поврзана со Коронавирусот, како во земјава, така и во странство, ви се обраќаме со отворено писмо со цел да ве поттикнеме да се преземат дополнителни итни мерки кои ќе овозможат зголемено дистанцирање меѓу поединци, односно спречување на ширење на вирусот, а при тоа ќе овозможат луѓето побезбедно да се движат. 
 Во согласност последната објава за задолжително физичко растојание, сметаме дека покрај обезбедувањето физичко растојание, поттикнувањето на не-моторизираното движење (пешки и со велосипед) ќе придонесе и за:

  • намалување на загадениот воздух, кој пак е поврзан со зголемен степен на смртност на корoнавирус пациентите според студии направени во Италија и САД;
  • поради редуцираноста на јавниот превоз на кој се потпираат голем дел од граѓаните, овие интервенции ќе овозможат пристап до безбедна алтернатива за движење за луѓето кои не поседуваат автомобил, немаат возачка дозвола и не можат да си дозволат користење на такси;
  • ќе им овозможат на луѓето потребна, минимална физичка активност и излегување на воздух додека патуваат до работа и ги извршуваат нужните обврски, што е позитивно за нивниот имунитет и добра психолошка состојба.

Нашиот предлог итни мерки се состои во поттикнување на луѓето да користат велосипед или да одат пеш преку зголемување на површините за возење велосипед и за пешачење во вид на привремени велосипедски или пешачки ленти на сметка на коловозите. 
 Во ситуација на значајно редуциран автомобилски сообраќај, овие интервенции е лесно да се реализираат без никакви негативни ефекти, како што покажува евалуацијата направена во Берлин.

 Предлагаме:

  • На булеварите со повеќе ленти, најдесната лента да биде привремено наменета за велосипеди, а велосипедската патека (доколку воопшто ја има) да биде привремено наменета за пешаци. 
  • На улиците каде има доволно широк коловоз да се воведат велосипедски ленти.
  • На улиците од понизок ранг - маалските улици кои немаат воопшто тротоари, немаат доволно широки тротоари или тротоарите се користат за паркирање, да се воспостави зона 20, односно ограничување на движење од најмногу 20 км/ч со цел да се овозможи безбедно споделено користење од пешаци, велосипедисти и моторни возила на коловозот.
  • Просторот зафатен со платените паркинзи како тие на ЈП Градски Паркинг, Град Скопје, ЈП за ПУП - Прилеп и ЈП Паркинзи на Општина Центар кои се долж улиците (и на сметка на тротоарите/односно улиците) да се врати на пешаците и велосипедистите.
  • Сите општини да ги лоцираат местата каде особено се групираат граѓаните чекајќи ред (пред маркети, аптеки, банки итн.) и да го прошират пешачкиот простор на сметка на колозовот и паркирањето.

Овие наши предлози ги доставуваме поради ситуацијата на недостаток на безбеден велосипедски и пешачки простор по улиците, особено кога е потребно безбедно разминување на растојание од најмалку 1 метар според препораките (според најновите препораки од Министерство за здравство - 2 метри), на тротоари и простори кои се некаде потесни и од 1 метар, а некаде и непостоечки. Дополнително, редиците кои се создаваат пред продавниците и аптеките бараат зголемен простор за да може на безбедно растојание да се чека ред, но и да може минувачите и тие кои чекаат ред да се разминат.

Овие наши предлози се преземени од мерките кои градовите од светот ги прават. Како илустрација ќе наведеме само неколку:

  • Берлин, Германија и Будимпешта, Унгарија воспоставија привремени велосипедски ленти на сметка на автомобилските ленти.
  • Богота, Колумбија, воспостави 117 километри привремени велосипедски рути за намалување на гужвите во јавниот превоз поради корона-вирусот.
  • Британија ги поедностави процедурите за општините да можат привремено да ги затварат сообраќајниците во корист на простор за пешаци и велосипедисти.
  • Бруклин (Масачусец), САД, ја менува конфигурацијата на повеќе улици со цел да обезбеди физичко дистанцирање меѓу пешаците и се укинува паркирањето на некои улици, а некаде се одземаат цели коловозни ленти, со цел да се добие привремено проширување на тротоарите.
  • Виена, Австрија, воспостави зони 20 во маалата каде тротоарите се тесни со цел пешаците да можат безбедно да се разминуваат.
  • Милано, Италија со цел намалување на аерозагадувањето ќе трансформира 35 км од коловозите во велосипедски и пешачки патеки.
  • Монтреал, Канада прошири тротоари на сметка на организираните паркинзи за автомобили со цел да им помогне на пешаците да одржуваат растојание еден од друг.
  • Нов Зеланд ги финансира општините да спроведат нискобуџетни интервенции (со боја, жардињери и конуси) на улиците со кои ќе го зголемат просторот за пешаци и велосипеди и кои можат да се изведат во рок од неколку дена.
Светската здравствена организација исто така дава препораки за пешачење и возење велосипед со цел да се остане физички и ментално здрав како мерка против коронавирусот, конкретно СЗО генералниот директор Тедрос Адханом Геврејесус на прес конференција на 20 март кажа: "За време на ова тешко време, важно е да се внимава на вашето физичко и ментално здравје. Ова не само што ќе ви помогне долгорочно, исто така и ќе ви помогне да се борите со КОВИД-19 доколку го добиете." Оттука ГД на СЗО препорачува, меѓу другото, доколку може да излезат луѓето да пешачат, да трчаат или да возат велосипед држејќи безбедно растојание.

Како што Министерот за здравство посочува, кризата ќе трае во текот на целата оваа година. Сите споменати градови посочуваат: дури и после достигнувањето на пиковите, мерките за физичко дистанцирање ќе мора да потраат подолго време, барем во текот на наредната година додека не се пронајде вакцина или поефикасен лек.  Исто така, ќе се зголеми бројот на луѓе кои ќе страдаат од проблеми со зглобовите, од кардиоваскуларни и други здравствени проблеми поради намаленото движење во периодот на строги мерки. Затоа, колку побрзо се започне со осмислување и спроведување на вакви мерки за овозможување поголем пешачки и велосипедски простор, толку подобро за сите. Оваа криза е нашето ново нормално за минимум една година и градовите треба да покажат резилиентност и флексибилност во справувањето со неа.  
 На подолг рок се надеваме дека дел од овие мерки ќе преминат од привремени во постојани, токму поради корисноста за општото добро и здравје на граѓаните. 

Ние, велосипедистите и пешаците, стоиме на располагање за консултација и помош во однос на спроведување на овие мерки.

Од:
граѓаните (велосипедисти и пешаци)
Иницирано од:
На Точак, Скопје
Здружение на граѓани Одржливи иницијативи - Скопје
(Социјален велосипедски центар - Педала; то4ак)
Поддржано од:
Здружение на граѓани Велес Бајкинг - Велес
Гостивар НаТочак
ИНЦФ - Организација за Информација и Природа, Скопје
Неформална велосипедска група "Explore Macedonia Tour" Скопје
Форум за Авангардна Креативност - Прилеп
Екстрим бајк тим Битола
Здружение за одржлив развој СФЕРА Интернешнал, Битола
МТБ Тетова
Здружение "Велосипед-2015", Прилеп
ВелоДостава Скопје
Локална Агенција за Развој, Струга
НВО Канабис Институт Пелагонија, Прилеп
Здружение ВЕЛОЕВРОПА - Скопје
Здружение ЕДИНСТВЕНА МАКЕДОНИЈА, Скопје
Регионален центар за шумарство и рурален развој-РЕФОРД, Скопје
Клуб за планинарски спортови Москито 2015, Кочани
Вело група Macedonian women bike squad, Скопје
Здружение на лица со параплегија и квадриплегија Без ограничувања, Кочани
Асоцијација за Активен Туризам Експлорер - Охрид 2018
Друштво неозбилни велосипедисти, Скопје
Здружение ИРЗ Тетово
Коалиција за одржлив развој - КОР, Скопје
Здружение за друмски и планински велосипедизам ”Маседониан Бајк Рајдерс”, Скопје
Здружение за култура и уметност „Колектив Ветерница“, Скопје
Здружение на граѓани Еко Логик, Скопје
Вело Училишта
Планинарски спортски клуб СТРУГА
ПрилепНаТочак, Прилеп
ЗГ Проактива Скопје
БитолаНаТочак, Битола
ТетовоНаТочак, Тетово
ГРИН-ОРГ-КО Кочани
Здружение ИЗВОР Кратово
“Регионален центар за одржлив развој“ Кратово
СтрумицаНаТочак, Струмица
Платформа Земи здив, Битола
Младинска Асоцијација ИМКА, Битола
Здружение на граѓани Центар за европски развој и интеграција, Битола
Интерактив, Битола
Здравје пред профит во Центар, Скопје

22.04.2020

Доставено до:
Влада info@vlada.gov.mk 
Мин. за здравство contact@zdravstvo.gov.mk
Град Скопје  gradonacalnik@skopje.gov.mk, kabinet@skopje.gov.mk 
Општина Аеродром aerodrom@aerodrom.gov.mk 
Општина Бутел  gradonacalnik@opstinabutel.gov.mk 
Општина Гази Баба opstina@gazibaba.gov.mk 
Општина Ѓорче Петров kontakt@opstinagpetrov.gov.mk 
Општина Карпош  gradonacalnik@karpos.gov.mk, kontakt@karpos.gov.mk 
Општина Кисела Вода contact@kiselavoda.gov.mk 
Општина Центар  info@centar.gov.mk, gradonacalnik@centar.gov.mk 
Општина Чаир  info@cair.gov.mk 
Општина Велес  opve@veles.gov.mk 
Општина Битола  Gradonacalnik@bitola.gov.mk
Општина Прилеп  prilep@prilep.gov.mk, gradonacalnik@prilep.gov.mk
Општина Тетово  proffice@tetova.gov.mk 
Општина Струга  kryetari@struga.gov.mk, info@struga.gov.mk 
Општина Охрид  info@ohrid.com.mk 
Општина Гостивар info@gostivari.gov.mk 
Општина Кочани  info@kocani.gov.mk 
Општина Струмица info@strumica.gov.mk 
Општина Кратово  opstina_kratovo@yahoo.com, contact.kratovo@gmail.com
ЗЕЛС   contact@zels.org.mk 
РСБСП contact@rsbsp.org.mk

Медиуми

Дополнителни информации:


27 March, 2020

Со возење велосипед против COVID-19



COVID19 сериозно влијае на нашето општество и секојдневниот живот на луѓето. Почитувањето на насоките за социјално дистанцирање и седење дома колку што е возможно повеќе се буквално од витално значење. Но, дали сè уште има место за велосипедот помеѓу сите овие мерки и рестрикции? Дали можеби тој може да придонесе за спроведување на овие мерки? Дали може да создаде можности и да понуди решенија? 


Почитувај ги основните мерки  

Од полициски часови до затворени училишта, Европските власти креираат мрежа од мерки наменети за да го спречат или забават ширењето на корона вирусот. Независно од фазата не мерките, тие неизбежно вклучуваат препорака да се намали бројот на сите патувања, да се применува социјално (физичко, н.з.) дистанцирање и да се избегнуваат сите непотребни контакти. Овие мерки влијаат на целиот наш начин на живот и постојано се бараат алтернативни решенија за да ни дозволат да продолжиме да ги обезбедуваме нашите основни потреби, да одиме на работа ако е неопходно и да продолжиме да имаме некаква физичка активност на отворено. 


Вози велосипед за сопствено добро 


Дозволените патувања варираат од држава до држава. Од напуштање на домот само за обезбедување храна и медицинска помош, до одење на работа, имање некаква физичка активност на отворено, во сите случаи прашањето на транспорт е есенцијално. Во Обединетото Кралство, група од шестнаесет водечки академици во отворено писмо ја повикаа владата да „дозволи безбедно пешачење и возење велосипед за време на пандемијата со Covid-19.“ Како што можете да прочитате во Forbes magazine.  


Вози велосипед за да почитуваш социјално дистанцирање


Иако сме согласни дека јавниот транспорт е важен дел од нашиот секојдневен живот, секој што може, треба да се качи на својот велосипед за кратки патувања. Возењето велосипед ни овозможува да го почитуваме социјалното дистанцирање на тој начин што го избегнуваме преполниот јавен транспорт, со што пак го намалуваме сопствениот ризик од добивање на вирусот и негово ширење понатаму. Но, ова истовремено значи и дека треба да се избегнуваат велосипедски ленти на кои има многу движење и да се вози велосипед сам или само со некој со кој живееме заедно за да се придржуваме до истото правило на социјално дистанцирање. Дополнително, треба да се вози велосипед со дополнителна внимателност за да не се предизвикаат незгоди и повреди во ова време кога болниците се преоптоварени. 


Вози велосипед за твоето физичко здравје  


Добро е познато дека физичката активност има голем придонес кон одржување на силен имунолошки систем. Качување на велосипед, забрзување на работата на срцето и длабоко дишење го прочистуваат нашето грло и бели дробови од бактерии, заштитуваат од хронични болести и го покачуваат бројот на бели крвни зрнца. Како што нè потсетува Bicycle network, возењето велосипед нè изнесува и на чист воздух. (Поради сето тоа, изберете велосипед место автомобил периодов за вашите патувања, н.з.)


Вози велосипед за твоето ментално здравје 


Моменталната ситуација, иако постепено се привикнуваме на неа, за многу луѓе може да биде извор на анксиозност и депресија. Возењето велосипед придонесува кон подобрување на менталното здравје и кон намалување на стресот. Повеќе студии покажуваат дека тие кои што ги извршуваат своите дневни патувања со велосипед се посреќни и помалку склони кон депресија од оние кои користат било која друга форма на транспорт. 


Вози велосипед безбедно и паметно 


Треба да возиме велосипед против COVID19, а не кон него. Затоа, внимателно грижете се за себе и за вашиот велосипед и почитувајте ги строгите правила за хигиена пред и по возењето.

Но кога се спомнува хигиена, што е со споделување на велосипеди? Споделувањето велосипеди секогаш ќе биде одлична алтернатива за луѓето што немаат сопствен велосипед. Но, важно е да се почитуваат строги правила за хигиена таму каде што сè уште е достапна опцијата за споделување велосипед (За жал кај нас не е, н.з.). Мијте ги рацете пред и по користење споделен велосипед, не го допирајте лицето додека возите и оптимизирајте ја вашата рута однапред.


Повеќе од било кога, од нас е побарано да го намалиме бројот на нашите патувања и кога ги имаме тие да бидат стратешки испланирани. Како да го го скратиме времето поминато надвор, а истовремено да го почитуваме правилото на социјално дистанцирање, да си обезбедиме храна и лекови и да го негуваме нашето физичко и ментално здравје? 

Едноставно е: Качете се #НаТочак и бидете безбедни! 

Оригинален напис: European Cyclists’ Federation - Cycling against the COVID-19 By Agathe Marie 25 Mar, 2020, https://ecf.com/news-and-events/news/cycling-against-covid-19
Превод: НаТочак

23 March, 2020

Допис за прекин на патеката на кејот на Вардар за мост на бул.АСНОМ


Денес, 23.03.2020 НаТочак испрати допис до Град Скопје во врска со прекинот на велосипедската патека на кејот на Вардар во општина Аеродром поради извршување на градежни работи за мостот на бул. АСНОМ, а без изведено заобиколување. Дописот е достапен во .pdf облик на следниот линк, а како текст во продолжение: --------------------------- Скопје, 23.03.2020
До: Град Скопје
Сектор за уредување и просторно планирање
Предмет: Пријава на инфраструктурен проблем – прекин на кејот за мост на бул. АСНОМ Почитувани,

По реакциите на многу граѓани до нас, би сакале да ве известиме за непочитување на точка 2.1.4 Воведување на обврска за задолжително обезбедување на алтернативни површини за пешачење и возење на велосипед при изведување на градежни работи на пешачки и велосипедски површини
од Планот за унапредување на велосипедски сообраќај кој Советот на Град Скопје го усвои во септември минатата година, при изведување на градежните работи за мостот на булевар АСНОМ.
Ова е извадок од Акцискиот план:

а целиот план е достапен на вашата веб-страница:

Велосипедската (и пешачката) патека по кејот на Вардар се моментално целосно прекинати без обезбедување на алтернативни патеки (слика во прилог). Фотографија на НаТочак - NaTochak.
Тараби на кејот на Вардар при изведување на
градежните работи за мостот на булевар АСНОМ


Граѓаните од општина Аеродром кои го користат велосипедот како превозно средство според слободни проценки (а кои може лесно да се докажат доколку би имале мерачи на клучни локации) дури и повеќе го користат кејот за да стигнат до центар од булеварските патеки.
Ова е особено значајно во периодот на здравствената криза со брзината на ширење на Ковид-19 кога секој велосипедист е битен заради намалување на гужвата во јавниот превоз. Многу градови апелираат на поголемо користење на велосипедот кај оние граѓани кои можат да го прават тоа, за да се намалат гужвите во јавниот превоз. Некои градови (како Богота, н.з.) дури и обезбедуваат привремени велосипедски патеки. Нашиот град не смее да ги прекинува најактивните патеки било кога, а особено не среде ваква криза.

Во моментов граѓаните од Аеродром без никакво навремено известување за градежните работи, без никакви насоки како да заобиколат, се принудени да стигнат до самите тараби и да се враќаат назад до првите скали и да го носат велосипедот во раце, а не секој кој го користи велосипедот како превоз го може тоа. Не треба да ви посочуваме какво демотивирање е тоа и како долгорочно ќе се одрази на развојот на велосипедскиот сообраќај во нашиот град. 

Бараме според зацртаните планови на Градот, во овој и во сите идни проекти, да не смеат да се прекинат велосипедски патеки, да не смеат да започнат градежни работи од изведувачите додека навремено не се обезбеди известување со соодветна сигнализација за насоки на движење, како и изведено безбедно заобиколување.

Дополнително, во точка 2.2.2 од истиот план: 2.2.2.Изработка на план за унапредување и проширување на велосипедската мрежа во Скопје за периодот 2020 – 2021 
има потточка која гласи:  интегрирање на патеката по должината на реката Вардар преку рампи и мостови.
Очекуваме идниот мост покрај што е најавено дека ќе има велосипедски патеки, да има и поврзување со патеката по текот на Вардар со возливи рампи. 
Тие рампи можеше да се изградат пред изградбата на мостот и да послужат како возливи врски по текот на заобиколувањето и додека траат градежните работи. 

Во врска со тоа, би сакале да ве потсетиме и на точките 3 и 7 од Меморандумот за соработка кој НаТочак го потпиша со градоначалникот Петре Шилегов во 2017 година (тогаш кандидат):
3. Новата градска администрација се обврзува да вклучи задолжителни велосипедски простори и патеки во секое идно проектирање на нова улица, булевар или мост.
7. Итно деблокирање на постоечките велосипедски патеки кај плоштад Македонија, патеката на кејот на Вардар и Стоковна Куќа Мост, создавање на повеќе рампи за приклучување кон патеката на кејот како и нејзино продолжување накај Сарај и Јурумлери.

Целиот меморандум, можете да го прочитате тука: https://natochak.blogspot.com/2017/10/blog-post_15.html

Согласно официјалниот План за унапредување на велосипедски сообраќај на Град Скопје и согласно Меморандумот за соработка потпишан со градоначалникот Петре Шилегов, се чини дека сфатено е големото значење на патеката по кејот на Вардар за Скопје.
Бараме тоа да се покаже и во пракса.

Доколку се уште не се започнати градежните работи, бараме да се тргнат тарабите до моментот на обезбедување рампи и безбедно и означено заобиколување за велосипеди и пешаци.

Доколку се започнати градежните работи, бараме итно делување со поставување рампи за туркање на велосипеди и соодветна привремена сигнализација и насочување, а во догледно време (наредниве месеци) и подобро пофункционално решение со возливи рампи, бидејќи велосипедскиот сообраќај и кејот не смеат да страдаат во наредните години додека се вршат градежните работи како што беше случајот (и се уште е) со прекинот кој го направи мостот за Панорамското тркало и сите останати мостови во проектот Скопје 2014.

Исто така, со цел вакви проблеми да не се повторуваат во иднина, бараме да испитате како се издала дозвола за извршување на градежни работи врз функционална велосипедска патека, без да се изведе вакво заобиколување.

Со почит,
НаТочак
23.03.2020

13 March, 2020

ЦРВЕНИ ВЕЛОЛИНИИ - велосипедска програма за Парламентарните избори 2020 (допис до политички партии)

На 13.03.2020 г. седум граѓански велосипедски организации од 7 градови во државата (Скопје, Битола, Прилеп, Гостивар, Тетово, Штип, Кочани) испратија допис до политичките партии кои ќе учествуваат на изборите на 12-ти април за вклучување на визија и стратегија во нивната изборна програма за унапредување на велосипедскиот сообраќај во Р.С.Македонија.
Во продолжение е e-mail-от пратен до политичките партиите, а дополнителните документи ги има тука:
  • Обраќање од НаТочак организации до политички партии 2020: линк (.pdf); линк (блог-пост)
  • Црвени велолинии 2020 - 9 клучни барања од НаТочак организации до политички партии: линк (.pdf); линк (блог-пост)
  • Известување до медиуми: линк (блог-пост)
------------------------------------------------
Почитувани претставници на политичките партии, 
Ви се обраќаме во името на 7 граѓански велосипедски организации од 7 градови со барање за вклучување на визија и стратегија за унапредување на велосипедскиот сообраќај во политичката програма со која ќе настапите на Парламентарните избори 2020, а со што ќе адресирате повеќе проблеми со кои се соочуваме на државно ниво (загадување, здравје, безбедност, климатски промени, квалитетна средина за живеење).

Нашето обраќање поврзано со новите Парламентарни избори 2020 го има во документот со наслов: 
 а во документот со наслов:
Ви ги испраќаме 9-те клучни барања кои интензивно ги комунициравме во јавноста последниот месец под мотото “ЦРВЕНИ ВЕЛОЛИНИИ 2020“. 

Деветте предлози сметаме дека во овој момент е исклучително важно да бидат вметнати во Вашата програма како ветување и обврзување за искрени, сериозни и посветени заложби за подобрување на ова поле, а подоцна и имплементирани како политики на национално ниво. 

Станува збор за многу повеќе отколку само за про-велосипедски политики.
Се работи за животи и за квалитет на живеење.

Со почит,
НаТочак - Скопје, Битола На Точак, Прилеп На Точак, Гостивар На Точак, Тетово На Точак, Штип На Точак, Кочани На Точак

ЦРВЕНИ ВЕЛОЛИНИИ 2020 - 9 клучни барања од НаТочак организации до политички партии


9-те барања во текстот во продолжение НаТочак ги промовираше во кампања на социјалните мрежи на крајот на месец февруари и почетокот на март 2020г. и на 13.03.2020г.  ги испрати до политичките партии кои ќе учествуваат на парламентарните избори на 12.04.2020г.

Facebook албум: линк
Twitter: линк
Instagram: линк

Обраќање од НаТочак организации до политички партии 2020: линк (.pdf); линк (блог-пост)
Црвени велолинии 2020 - 9 клучни барања од НаТочак организации до политички партии: линк (.pdf); линк (блог-пост)
Известување до медиуми: линк (блог-пост)

Голема благодарност за дизајнот до Александра Христов. 

--------------------------------------------------------



1. ДОНЕСУВАЊЕ ПРАВИЛНИК ЗА ПРОЕКТИРАЊЕ И ИЗГРАДБА НА ВЕЛОСИПЕДСКА ИНФРАСТРУКТУРА    

Во моментов немаме речиси никакви стандарди за проектирање на велосипедска инфраструктура.  

📌 Во Правилникот за стандарди и нормативи за урбанистичко планирање има само неколку реда за минималната широчина на велосипедска патека и толку.  

📌 За разлика од тоа, стандардите за автомобилски сообраќај пропишани се на долго и широко во повеќе правилници на десетици страни, разработени се разни категоризации, проектни брзини и широчини на ленти, радиуси на вртење, бројност на возила, бројност на ленти, начини на вкрстување, начини на паркирање итн.  

📌 Нашата регулатива не само што ги става автомобилите на прво место, туку за неа другите начини на сообраќај речиси и да не постојат, за нив не се пропишани стандардите ни приближно детално како за автомобилите. 

📌 Оттука, не е воопшто за чудење што нашите градови се целосно автоцентрични.

И да сакале од некоја општина да проектираат велосипедски патеки, немале на што да се повикаат од државните прописи, а ако се повикале на туѓи прописи, лесно проектот можел да им биде одбиен од институциите кои треба да го одобрат (нешто што многу често се случува во МВР во однос на велосипедските проекти поднесени од Град Скопје)  

🚲 Поради ова, во врвот на нашите барања до идниот Парламент и раководства на Министерствата (пред сè Министерство за транспорт и врски) е да се донесат веднаш СТАНДАРДИ ЗА ВЕЛОСИПЕДСКА ИНФРАСТРУКТУРА во специјален ПРАВИЛНИК.  

📐Координативното тело за велосипедски сообраќај на Град Скопје веќе има направено работна верзија на Правилник за стандарди за велосипедска инфраструктура, само треба да се доработи и да се усвои.

 ❗️ Ова е базично прашање од голема итност, во ера на битка со загадувањето и климатските промени.  

📌 Соодветно на дефинираните типови велосипедска инфраструктура во Правилникот (велосипедски патеки, ленти, премини, велосипедски пат, велосипедска улица, велосипедски паркинг) потребно е да се направат измени и за начинот на нивно користење во Законот за безбедност на сообраќајот на патиштата од страна на Министерство за внатрешни работи. 



 2. ВЕЛОСИПЕДСКИ ПАТЕКИ ЗА СИТЕ ПОГОЛЕМИ НАСЕЛЕНИ МЕСТА И НАЦИОНАЛЕН ФОНД ЗА ПОДДРШКА  

📌 Освен Скопје другите градови немаат воопшто План за велосипедски патеки, а уште помалку План за одржлива мобилност.  
📌 Иако во уште 6-7 градови граѓаните на организиран начин, веќе 5-8 години се организирани и се застапуваат за промени, повеќето општини сè уште немаат изградено ниту 1 km велосипедска патека.

📌 Поради недостатокот на визија кај локалната самоуправа да се гледа надвор од традиционалниот автоцентричен модел на планирање, недостаток на финансии и стручни капацитети, неопходно е Владата и државните институции да дадат поттик во правилна насока, преку соодветни обврски, но и поддршка

Примери од соседството: 

Словенија започнува еден ваков процес во 2015г. кога преку Министерството за инфраструктура со обезбеден Национален фонд и поддршка од претходно обучени лица, во рок од само 2 години, дури 70 општини во Словенија изработуваат Планови за одржлива мобилност (SUMP).

Општините кои изработиле планови, добиле поддршка од европски фондови и за реализација. Реализацијата вклучила подобрување на инфраструктурата за пешачење, возење велосипед и за јавен превоз, како и други слични мерки.

На располагање за оваа активност, финансирање и консултантски услуги стојат и европските фондови и проекти. Една ваква обврска ќе ги поттикне општините да воспоставуваат и меѓународни соработки, регионална соработка, споделување искуства со други општини и сл. Оваа обврска е целосно во насока на целите за намалување на загадувањето (транспортот е втор фактор по уделот во загадувањето), подобрување на здравјето, зголемување на безбедноста во сообраќајот (која е цел на транспортната стратегија на РМ) и подобрување на економската клима.

💲 Попривлечни за инвестирање се дестинациите кои нудат диверзитет на транспортни опции. Одредени инвеститори веќе бараат градовите каде ќе отвораат свои капацитети да имаат развиена велосипедска мрежа и јавен превоз.

💲 Кога би направиле студија колку се загубите од загадувањето, бучавата, повредените во сообраќај, загинатите, од кардиоваскуларни заболувања поради мала физичка активност, од изгубеното време и волја за работа со барањето паркинг за кола, резултатите ќе укажат дека целосно неодговорно го планираме транспортот и создаваме свесно загуби од секој аспект.

📈 Во сè повеќе студии се покажува дека инвестирањето во велосипедска инфраструтура има висок степен на поврат. Проценката на Лондон за велосипедската мрежа е дека има Benefit Cost Ratio (соодност на придобивки / трошоци) од дури 3.94, што е одлично за транспортен проект и ги надминува сите инвестиции во патишта и улици за автомобили.

💲 Академски анализи на Копенханген заклучиле дека возењето автомобили го чини општеството 6 пати повеќе од возењето велосипед. Секој извозен километар со кола го чини општеството 0.15 €, а општеството заработува 0.16 € со секој извозен километар со велосипед.

📈 Имајќи ги сите здравствени, еколошки и економски придобивки, определувањето на ваков Фонд и ваква визија се една од попаметните инвестиции кои една држава МОРА да ги направи.


3. МЕЃУГРАДСКИ ВЕЛОСИПЕДСКИ СООБРАЌАЈ И ВЕЛОСИПЕДСКИ ТУРИЗАМ  

Инфраструктурата од државно значење, опфаќа освен автомобилска, така и железничка, така и велосипедска инфраструктура.  Кога се зборува за инфраструктурни проекти и инвестиции, кога се зборуваме за сообраќај, не треба да се мисли само на автомобили.  

🚲 Како што има автопати, треба да има и велопати. Јавното претпријатие за државни патишта може да ги поврзе блиските населени места и преку велосипедска инфраструктура.  

♻️ Покрај секој град има населени места на мало растојание кое може да се совлада со точак. Граѓаните можат да возат ~5 km во насока кога се прекрстуваат со моторен сообраќај, но кога се издвоени, за нив стануваат прифатливи и дистанци до 10, 15 km. Така барем дел од патувањата до работа и разни услуги би можеле да ги прават со точак.  

🚲 Ваквите патеки би имале и транспортна и туристичка функција, особено во овој период кога веќе е во подем велосипедскиот туризам, не мора да одиме подалеку за примери. Во Албанија веќе има патека во дел покрај Охридско Езеро, со прекугранична соработка Босна и Хрватска претвораат неупотребувани шини во велосипедски патеки, Унгарија веќе нуди широка мрежа на велосипедски патеки, и многу земји од регионот, освен Македонија, веќе вложуваат во Еуровело рутите кои минуваат низ нивната територија.  

Низ Македонија е планирано да минуваат 2 од Еуровело рутите:

🏞 По текот на Вардар - Рута 11 East Europe Route која ги врзува Норвешка и Грција;

🌄Паралелно на границата со Бугарија - Рута 13 Iron Curtain Trail која минува по границата на западниот и источниот блок;  

❗️ Но потребно е од властите да ги изградат, уредат, означат за да нè поврзат во континенталната Европска велосипедска мрежа. Покрај Еуровело рутите и врските меѓу населените места, во нашата национална велосипедска мрежа треба да има:

Велосипедски рути во атрактивни предели кои ќе го намалат автомобилскиот притисок, а ќе поттикнат и нов зелен туризам (пр. околу Охридско, Мавровско Езеро итн);

Велосипедско поврзување со соседите (со Косово по текот на Лепенец; кон Софија, кон Грција по текот на Вардар, од Битола и Струга кон границите) итн.  




 4. МАКЕДОНСКИ ЖЕЛЕЗНИЦИ ДА ОВОЗМОЖАТ ПРЕВОЗ НА ТОЧАЦИ ВО ВОЗ 

1 🚉 = 8 🚲

МИНИМУМ 8 МЕСТА ЗА ТОЧАЦИ ВО ВОЗ  

Сосем извесно е ова да стане правило во ЕУ за сите нови и сите стари возови после обновување. 

Преку кампањата #TrainsForCyclists, Европската велосипедска федерација (ECF) и нејзините членки целат да стане обврзно сите возови на европско ниво да имаат специјален простор за барем 8 точаци. Така ќе се поврзат најефикасните и најодржливите опции за мобилност: железница на долги дистанци и велосипед на кратки.

Моментална ситуација во нашата железница е забраната за превоз на точак во воз.  

Ние како држава, иако декларативно се залагаме за битка со климатските промени, загадувањето, метежот во сообраќајот, нездравите навики, социјалната нееднаквост, сè уште кога зборуваме за сообраќај, мислиме на автомобили, сè уште немаме никаква визија за одржлив транспорт и не си ги поставуваме сами правилата на игра во корист на одржливиот транспорт кој помага да се решат сите наведени проблеми.  

Бараме:

♻️ Одржливиот транспорт и интермодалноста да бидат високо во транспортната стратегија на Министерството за транспорт и врски;

🚲 При железничките (и автобуските) станици да се постават безбедни паркинзи за сопствени велосипеди и станици за изнајмување на велосипеди;

🚉 Во секој стар воз со адаптирање Македонски железници да овозможи простор за поставување на минимум 8 велосипеди според правилото за кое се застапува ЕВФ, а при набавката на нови возови да се води сметка за спецификациите.  

♻️ Да не слушаме само ветувања за километри асфалт и продолжување на автоцентричноста, да слушнеме за поинаква транспортна визија. Мултимодалност и интермодалност. 



5. ВИЗИЈА ЗА НУЛА ЖРТВИ ВО СООБРАЌАЈОТ 

Во нашите населени места е пракса да се градат улици со широчина на лента каква што во Холандија (една од 3-те држави со најбезбеден сообраќај во светот) имаат автопатите и притоа:

                    за 20% ја зголемуваме цената на чинење (лентите се широки 3.5m наместо 3m и помалку)

                    • за 80% ја зголемуваме проектната брзина (од 50 на 90km/h)

                    за 100% ја зголемуваме шансата за смртност (од 50% на 100%), а со тоа и барем двојно го зголемуваме бројот на жртви  

⛔️ Политичарите треба да станат свесни колкава одговорност за човечки животи лежи во таквите проекти и да престанат контрадикторно да промовираат “ја зголемуваме брзината и безбедноста“. Одговорните политичари се борат за поголема безбедност, помали брзини и нула жртви од сообраќај.

☹️ Секоја година 130-200 граѓани (7.5 на 100 илјади жители) го губат животот на улиците и патиштата низ Македонија.

Преку својата Визија Нула, Норвешка во 2017 достигна 2 жртви на 100 илјади жители (европски рекорд) и продолжува да се стреми кон нула (Vision Zero).  

⚠️ VISION ZERO пристапот го става фокусот на одговорноста на системот, не очекува дека со кампањи ќе создаде совршени поединци. (кон што најчесто се насочени кампањите на РБСП)

Преку Vision Zero се цели да се создадат такви сообраќајни решенија што човечката грешка ќе ја сведат на минимум: успорување на сообраќајот, стеснување на лентите, подигнувања на коловозите, обезбедување инфраструктура за пешаци и велосипеди, намалување на присутноста на автомобили итн.

📊 Кампањите се покажало дека делуваат кај 1-5% од луѓето.

📊 Казнените модели делуваат, но само кога е присутна полицијата и кога е непристрасна и некорумпирана, туку соодветно едуцирана

📊 Но дизајнот на инфраструктурата делува 100% од времето кај 100% од луѓето.

БЕЗБЕДНИОТ ДИЗАЈН НА УЛИЦИТЕ СПАСУВА ЖИВОТИ.  

Затоа бараме:

Донесување ВИЗИЈА НУЛА (VISION ZERO) за нула жртви во сообраќајот на државно ниво која ќе ги вклучи сите релевантни чинители.

Промена на стандардите за широчините на ленти, големините на радиусите и проектните брзини во новиот Правилник за урбанистичко планирање (моменталниот е заснован на претпоставки постари од половина век)

Сите улици од секундарна мрежа да имаат смирен сообраќаj до max 30 km/h и да се користат физички методи на смирување (подигнати крстосници, подигнати пешачки премини, искривување на коловозот)

Активирање и едуцирање на сообраќајната полиција пред сè за брзото возење и подобрување на задолжителното образование (основно и автошколи).

❗️ Да учиме од добрите примери, а не да ги повторуваме неуспешните обиди на решавање на проблемите само преку кампањи до недоглед. Бараме системска одговорност и стремење кон НУЛА ЖРТВИ. 




  6. ОСЛОБОДЕНИ ТРОТОАРИ, ВЕЛОСИПЕДСКИ ПАТЕКИ, ЈАВНИ ПОВРШИНИ

 🛋️ Јавниот простор треба да биде заедничка дневна соба на градот, а не складиште на приватни автомобили.  Сите сакаме да посетуваме и престојуваме во градови кои ги ставиле под контрола колите, не градови во кои колите царуваат и се поважни од луѓето. Сакаме и да живееме во таков град, но тоа не можеме да го обезбедиме сами како поединци, тоа мора да ни го обезбеди системот.

🚧 Општините со физички пречки да го спречат паркирањето по тротоарите

👮 Полицијата да казнува.

🏬 И не се само автомобилите, тука се и предимензионираните доградби од кафулињата, легални или нелегални, трафиките, билбордите, контејнерите, сета опрема која одзема од просторот за движење. 

📐Слободните профили на нашите пешачки и велосипедски патеки мора да бидат гарантирани и заштитени со национални стандарди по целата должина, исто како што се за автомобилите, а за опремата да мора да се определуваат специјални зони на поставување кои нема да пречат на ниту еден тип сообраќај.  

Улиците треба да се пријатни, добро дизајнирани, без високи рабници, слободни од нелегално паркирање и пристапни за сите!

🚶️За децата да можат сами да одат на училиште!

🦽За лицата со попреченост независно и слободно да се движат!

🛴За сите на тркала (со велосипеди, тротинети, бебешки колички) да се движат без пречки!  

За слободни, а не заробени јавни простори!  

Бараме:

Институциите да согледаат дека паркингот е привилегија, а не право, за разлика од правото на слободно движење и правото на живот на граѓаните кои се движат пеш, со велосипед, со количка;

МВР да не толерира окупирање на јавен простор и да се застапи за безбедноста во сообраќајот пред непостоечкото право на паркирање на несоодветни места;

Доколку МВР не ги ослободи јавните простори, да се дозволи формирање на комунална полиција, која ќе казнува;

Сите јавни површини да се направат пристапни за тркалата на лицата во колички, детските колички, тротинетите, велосипедите;

Министерство за транспорт и врски да донесе правила за поставување на урбана опрема, со кои ќе ги заштити пешачките и велосипедските профили, со цел да не се загрозува движењето. 




7. ЗАДОЛЖИТЕЛНИ ПАРКИНЗИ ЗА ВЕЛОСИПЕДИ ВО СТАНБЕНИ, КОМЕРЦИЈАЛНИ, ЈАВНИ ОБЈЕКТИ

Доколку се стремиме велосипедот да биде користен како секојдневно превозно средство, велосипедскиот паркинг, т.е.  

1. безбедното паркирање на кратко време на соодветни држачи и

2. безбедното складирање на подолго време во соодветни простории

е една од темите кои треба сериозно да се адресираат со соодветни правила за проектирање. 

☹️ Недостатокот на безбеден и лесно достапен паркинг ги демотивира луѓето да го користат велосипедот како редовно транспортно средство. Луѓето кои сепак го користат, ги користат ходниците од зградите, оградите од скалите или па минуваат низ становите (можеби со нечист точак) за да го закачат на ѕид или изнесат на тераса. Дури и да имаат ходници/место во станот, некогаш мора да го креваат во раце (ако нема лифт во зградата или е многу мал или доколку нема рампа на влезот).

Тоа можат да го прават само луѓето на одредена возраст, со одредена физичка подготвеност, бидејќи бара напор и посветеност да го прават на секојдневна основа. 

🚲А велосипедот е превозно средство за сите. И за физички поспремните и помалку спремните, и за младите, и за повозрасните и за децата. ТРЕБА ДА БИДЕ. Постојат и велосипеди за лица со попреченост. Но каде да ги чуваат, како да ги изнесат надвор и како да бидат независни во своето движење?  

Начинот на паркирање и складирање на велосипедот треба да овозможи леснотија и комоција на користење, да биде на приземје или во подрум, достапно со пристапна рампа или соодветен лифт, или пак во дворот, зависно од решението.

❗️ Ова мора да стане задолжително за сите нови објекти, без оглед дали се станбени, комерцијални, јавни објекти, да биде услов за градба, како што во моментов е паркингот за автомобили.

Бараме:

Да се предвидат стандарди (тип и број на паркинг места) за различните типови објекти;

Владата да ги обврзе сите јавни институции (веќе изградени) да обезбедат паркинг за велосипеди.

За постоечките објекти со други намени (станбени, комерцијални) треба да се смислат решенија во соработка со локалната самоуправа.

Но во никој случај не смееме да ја пропуштиме шансата за новите објекти кои се градат секој ден, бидејќи секој ден одолговлекување е изгубена шанса за нивните станари да можат комотно да ги чуваат велосипедите.  

Велосипедот зафаќа помалку простор од автомобилот (на едно паркинг место за автомобил може да се паркираат во едно ниво 10-12 велосипеди, а во нивоа или со вертикално поставување на соодветни држачи и повеќе). Овој простор е незначителен спрема просторот потребен за обезбедување паркинг места за автомобили.


8. ВЕЛОСИПЕДОТ - ДЕЛ ОД ОБРАЗОВНИОТ ПРОЦЕС  

🚲 Велосипедот порано беше поприсутен во образовниот отколку денес кога е многу попотребен.  Кампањските активности за едукација за безбедност кои ги прават Советите за безбедност, Полицијата итн. се добри, за да поттикнат на решение, но не се трајното и главно решение. Преку кампања ќе допрат само до неколку класа од стотици во државата. Преку кампања се одржуваат неколку часа, наместо да има континуирана програма со години.

Мораме да констатираме дека:

Не постои гарантиран формален начин на изучување на управувањето со велосипед, моментално зависи од поединци и ентузијасти меѓу наставниците, не е задолжителен дел од програмата.

Возачите на автомобили се едуцираат во автошколите, но нема место каде формално да се изучат вештините и знаењето потребно за управување со велосипед. Сметаме дека најдобро место за тоа е основното образование.

Затоа МОН во програмата за основно образование треба да вклучи задолжителна теоретска настава за сообраќај и практично совладување вештини за возење велосипед.

Децата да почнат во дворот на училиштето со мобилни полигони, па да прејдат на поголеми градски полигони каде на безбеден начин ќе биде симулирана реалната сообраќајна средина, а дури потоа да излезат во реален сообраќај.

❗️ Денес децата се принудени директно на заглавени улици со коли или паркинзи да изучуваат возење велосипед што е опасно, демотивирачко, а и не секое дете ја има таа можност да поседува велосипед или некој да го подучува во рамки на семејството.

Затоа, ЗАДОЛЖИТЕЛНО ОБРАЗОВАНИЕ ЗА ВЕЛОСИПЕДИ и ЗАДОЛЖИТЕЛНИ ВЕЛОПОЛИГОНИ ВО ПОГОЛЕМИТЕ НАСЕЛЕНИ МЕСТА! За да создадеме вешти и одговорни учесници во сообраќајот на велосипед!

Овие полигони, слично како програмите за млади и спорт може да се финансираат преку Национален фонд.

Друго место во програмите за образование кое треба да се менува, се програмите во автошколите. Значителен дел од полнолетното население минува низ тие програми и тоа е шанса да се надомести недостатокот на сообраќајно образование за тие генерации.

Современите автошколи не треба да го научат идниот возач само да управува со возилото, туку да биде и одговорен учесник во сообраќајот на сите различни начини, особено во неговата интеракција со другите типови сообраќај. 

Современиот пристап на одржлива безбедност цели да ги стави возачите во различни улоги за време на часовите во автошколите: пар часови во улога на пешак и на велосипедист, за да знаат како е од другата страна, но и да станат севкупно одговорни мултимодални учесници во сообраќајот свесни за целината, кои кога се во улога на возач на моторно возило ќе се грижат за послабите.

И образовните програми мора да се согласни на вредностите кои (сакаме да) ги имаме во сообраќајот.  

9. ЕДЕН ДЕН МЕСЕЧНО – ДЕН БЕЗ АВТОМОБИЛИ ВО ЦЕЛА ДРЖАВА   

📌 Во Богота (и во други градови во Колумбија) секоја недела од 7 до 14 ч, 120 km улици се затвораат за возила и се отвораат за велосипеди, но и секакви рекреативни активности (трчање, јога, аеробик).

Во настанот наречен CICLOVIA учествуваат 2 милиони луѓе или 30% од популацијата.

📌 Други градови тоа го прават еднаш месечно, како Париз: секој прв ден недела во месецот. И во тој еден ден има резултати: намалено загадување, намалена бучава, намален стрес и можност да се погледне сопствената средина со поинакви очи: како би изгледала и звучела со помалку автомобили.

📌 Еднаш годишно и десетици македонски градови организираат т.н. Ден без автомобили, во рамки на Европската недела на мобилност (16-22 септември). Но, најчесто тој ден се сведува на получасовна велосипедска парада и се губи вистинското значење. Преретко е, прекратко е и не се доловува суштината.  

🚲 Вистински Ден без автомобили значи улицата во значителен дел од денот да биде отворена за различни активности: возење точаци и тротинети, џогирање, вежбање на отворено, музика, шетање, детски улични игри, можностите се многу.

Не сакајќи, вакви денови или часови сме добиле при посетата на Папата, за време на маратони, за време на политички настани или протести. Но поентата е да ги добиеме и на организиран и смислено промовиран начин заради нас, граѓаните!

🚲Докторите во светот, веќе препорачуваат по 30 мин. возење точак на ден, по 10 илјади чекори пешачење. Некои организираат групни пешачења или возења точак на своите пациенти. Здравствени организации препорачуваат до Владите да вложуваат во пешачка и велосипедска инфраструктура. Министерствата за здравство се едни од поборниците за стратегии за пешачење/возење велосипед во многу држави, но не и кај нас.

🚲Седечкиот начин на живот влијае на зголемување на ризикот од многу болести и потребно е преку смислени политики да се поттикнат луѓето да имаат умерена физичка активност на редовно ниво. Тоа е наједноставно да се прави преку движењето: пешки или на точак.  

Бараме:

Министерство за животна средина во соработка со Министерство за здравство и поддршка од МВР да иницира Ден без автомобили / Отворени улици / Цикловиа / Здрави улици (или како и да го именуваме локално) во еден определен ден во месецот (на пр. секоја последна сабота или недела) низ цела држава;

Да се обврзе секоја единица на локална самоуправа да избере улици во населеното место кои ќе бидат затворени за автомобилски сообраќај, а отворени за пешачење, возење точак, трчање, шетање, детска игра, слободни активности;

Преку ваква масовна кампања ќе се поттикнат луѓето да замислат каква би била нивната средина и начин на живот со помала употреба на автомобили, а ќе им се овозможи и нов начин на социјализација во јавен простор и физичка активност, особено важно за постарите лица, за лицата со посебни потреби, за децата, и особено важно во недостаток на слободен јавен простор.