19 September, 2013

Критична маса #17: Ние сме сообраќај

Датум: 25.09.2013
Тргнување17:30, Парк на езерата, Аеродром

Крај (подигнување на точаците): плоштад Карпошово востание

Проекција: 20:00, Ла Кања, Стара Чаршија
--------------------------------------------------------------
Промотивни материјалилинк.
Facebook настанлинк.
Руталинк.

Известување до медиуми: линк.

--------------------------------------------------------------
постерот за КМ 17

Иако повеќето од нас се пораснати во средина каде велосипедот се користи претежно за забава или спортување, со тек на време научивме дека велосипедот е и транспортно средство, високо-ефикасно, урбано, нештетно по околината, а корисно по здравјето, лично и на градот. 
Ние сме сообраќај и имаме право на добри сообраќајни услови! 
Имаме право на издвоени велосипедски патеки во склоп на сите булевари.
Имаме право на велосипедска мрежа….на велосипедски паркинзи...
Имаме право на „зони 30“ за споделување на улиците со моторен сообраќај, во случај на неможност за изградба на велосипедски патеки или ленти на потесни улици.
Имаме право да стигнеме безбедно до било која точка во градов! 
Внимавајте на луѓето на точак и земете не' предвид!
Точак е возило, а на точак сме сообраќај!

Со Критична маса 17 ќе поврземе делови од градот во кои исто така живеат и работат наши сограѓани и имаат право да сообраќаат на точак, но не се поврзани со велосипедска инфраструктура. Затоа оваа рута ја нарековме херојска. Оние сограѓани од Маџари, Ченто и Автокоманда кои возат точак се секојдневно изложени на ризик поради небезбедните улици за други начини на сообраќај освен моторен.
Дури и во оние делови низ кои поминуваме каде постои велосипедска инфраструктура, таа е руинирана. 
Возиме во група да бидеме побезбедни и да покажеме видливост. Возачите да станат свесни дека велосипедистите се учесници во сообраќајот и нормално е да ги има и на улица во случај кога нема велосипедски патеки или се окупирани или па се во лоша состојба.
Апелираме на опременост со предно и задно светло и мачкини светла и големо внимавање едни на други.

Придружи ни се да бидеме побројни и повидливи.
Да инспирираме возењето точак како превозно средство да дојде на дневен ред во животите на нашите сограѓани и во сликата за Скопје на одговорните! 

Ќе се движиме по следнава рута:


View Критична маса #17 in a larger map

Точаците ги подигнуваме на плоштадот Карпошово востание по што продолжуваме туркајќи ги низ чаршија до платото помеѓу Ла Кања и Чифте Амам каде ќе се проектира документарниот филм „We are traffic“ за почетокот на движењето Критична маса во Сан Франциско пред 20-ина години.
Паркот на езерата, Аеродром, местото на собирање
Ширинката на поштадот Карпошово востание
каде ги подигнуваме точаците после пристигнувањето

Се гледаме во среда!
Ѕрн- ѕрн! 
-------------------------------------------------------------- Секој учесник вози на своја одговорност.

Промотивни материјали #КМ17

[дизајн: Ива Димовска]

МАТЕРИЈАЛИ ЗА ПЕЧАТЕЊЕ
(постери и флаери)
постер, А3, верзија за веб и печатење (jpg)
Флаери во боја, предна страна, 4 на А4, верзија за веб и печатење (jpg)
Флаери во црно-бело, предна страна, 4 на А4, верзија за печатење (jpg)
Флаери во боја, задна страна, 4 на А4, верзија за веб и печатење (jpg)
Флаери во црно-бело, задна страна, 4 на А4, верзија за печатење (jpg)

МАТЕРИЈАЛИ ЗА ВЕБ
(банери)

веб-банер 300x250
веб-банер 980x750
веб-банер 900x800
веб-банер 980x100
аватар, 180x180
веб-банер, 851 x 315 (FB cover)

Промотивните материјали од овој блог- пост може слободно да се споделуваат и печатат, да се користат во рамки на објави за настанот или како линкови.
Однапред ви благодариме на помагањето да се прошири информацијата за Критична маса #17 и и' благодариме на Ива Димовска за дизајнот.

04 September, 2013

Интервју со Димче Димески за неговата инсталација Критична Маса - Првиот бран


Критична маса е инспирација сама по себе. Секое возење до сега успеало да створи некоја приказна. Дали ќе остане момент кој некој си го фатил само за себе додека возел или ќе биде муабет со некого кој ќе доведе до нешто трето... Некои приказни си остануваат лични, но секогаш има по некоја за која дознаваме. 
Во случајов, збирот на повеќе лични размислувања на еден уметник го интегрираа проектот „Критична маса ~ Првиот бран“, како концепт од циклусот „Критична маса“, инициран од лична рефлексија, поттикната од урбан настан, проследен со велосипедско движење, како дел од поголемо глобално движење во главниот град Скопје. 
На КМ 11 имавме среќа да дознаеме за работата на Димче Димески. Во неврзан муабет ни раскажа дека подготвува изложба со инсталации инспирирани директно од првата Критична Маса, мај 2012. Самиот проект претставува дел од поголем проект, од циклус концепциски поставен, планиран да се реализира во повеќе фази и правци, со што би се довело до негово целосно заокружување.
Непосредно пред изложбата која ќе се отвори на 4-ти септември во Чифте Амам седнавме на краток разговор со Димче. (линк до настанот)

1. Што беше толку посебно во настанот што те инспирираше да му посветиш изложба?

Што беше посебно? Да речеме дека беше спонтано - не беше спонтано, туку беше со намера. Но некако како да имаше ефект на спонтаност, на нешто без задни намери. Кога го видов тој евент што ми го прати еден другар јас искрено не очекував многу, бидејќи живееме во едно индолентно, незаинтересирано и летаргично општество, сите се скроз незаинтересирани, и не може да се покрене никаква критичност, критична маса на народ за да се мрднат работите. И кога дојдов на настанот кога видов толку собрани луѓе, се воодушевив. Кога видов група на луѓе кои што во друга прилика би се исколеле меѓу себе, бидејќи едни со други не се трпат, различни групи на луѓе, стари и млади, различна старосна група, расна поделба, политичка... на секаков начин разделеност, овојпат преку овој настан сите беа заедно. Сите го возеа патот.


2. Те инспирира ли возењето точак? И возењето точак во Скопје?

Па нормално дека ме инспирира, па јас сум постојано на точак.

3. Мислиш ли дека има простор за повеќе уметност во вело-културата во Скопје? 

Има мислам доста простор, само што треба да се покаже иницијатива. Има доволно критична маса за да се покрене иницијатива, ама сепак оние кои се дел од критичната маса, што возат точаци низ градот, што ја почитуваат вело-културата, тие немаат доволно моќ да ги покренат работите бидејќи самите моќници знаеме какви се и како се движат.

4. Може ли да ни кажеш некои детали за инсталациите: какви материјали користиш, какви композиции, зошто се одлучи за вакви техники?

Пред се јас многу ја истражувам линијата и експерименталниот цртеж, тоа моментално ми е приоритет. Меѓу другото, кога се вратив од првата критична маса во Скопје бев воодушевен, едноставно седнав и не можев да се воздржам ни 5 минути, сакав штом стигнам дома одма да направам скици на целиот настан, бидејќи јас немав време да сликам и се нервирав зашто не земав ни апарат ни камера ... ништо. Крајот беше врвот и меѓу другото тоа е она што најмногу ми остави впечаток и тоа и го исцртав. Видов дека самиот експериментален цртеж всушност испадна многу добро. Почнав уште еден и уште еден и уште еден, направив цела низа на експериментални цртежи и едноставно се решив и си реков зошто всушност да не ја опфатам оваа тема. Оваа тема отвара доста простори, доста големи хоризонти. Прво самото тоа што ние се движиме со сопствена енергија, со тоа имаме и повеќе енергии кои ги придвижуваме и заедно обединети... тие придвижуваат уште поголема енергија. А крајот никогаш не се знае дали ќе биде позитивен или негативен, дали ќе има исход, дали ќе нема исход.
За материјалите - кога почнав да употребувам молив и хартија, експериментирав исто така и со потег на жица, која исто така е буквално линијата, цртежот. И почнав да виткам жици. Јас и претходно имав разработено други актови со жица, и си реков ајде да ги поставам во позиција со жица актовите во позиција на возење на точаци. Но тоа е всушност доста комплицирано и доста тешко бидејќи бара други движења друга поставеност, статика и сето тоа... Исто така користев и жица и плексиглас, чиста и едноставна реализација. Почнав да користам и конектори бидејќи самиот момент критична маса Скопје и урбаниот момент што таа го доловува, бидејќи во големите градови се случуваат големите нешта, почнав конекторите да ги користам со илузија на сенки од згради, односно како ние сме конектирани со градот, сите ние зависиме од градот и колку може да влијаеме ние на градот, и колку градот зависи од нас но исто така и колку ние можеме да бидеме независни од градот.

5. Што значи првиот бран?

Јас мислам дека тоа што се случи беше прва иницијална каписла за нешто многу поголемо. Ги преземав точаците, тркалата и спиралата, а претходно имав интересирање за енергијата, за различните аспекти на животот. Ова ми поттикна уште поголеми размислувања и меѓудругото јас го најавувам првиот бран како нешто многу поголемо од ова со точаците. Дали самата свест на луѓето ќе се зголеми и ова со точакот ќе предизвика поголеми нешта не знам, но ова е за мене иницијалната каписла на позитивни промени.
6. Што е неопходно за да започне бранот на позитивни промени? Како да се поттикнат луѓето на поактивен однос кон стварноста? 

Некои работи не можеме преку ноќ да ги создадеме или предизвикаме. Едноставно треба ние да се вложиме самите во себе колку можеме и умееме.

7. Дали мислиш дека чиста иницијатива и искрена намера е приоритет број еден за некоја ваква акција од урбан тип да успее? 

Да и не само од урбан тип туку општо. Никогаш не се знае крајниот резултат, ние можеме само да претпоставуваме и да се надеваме. Но главната работа е што се поттикнува нешто и со тоа ние си ја завршуваме својата работа и својата желба. Тоа покажува што сакаме да постигнеме. Поточно ефектот на пеперутката. Значи ако негде на другата страна од светот замавне пеперутката, на другата страна од светот има ураган. Така да ние ова што го правиме тука, сигурно ќе има некој импакт. Може нема да се случи одма, нема да даде резултати одма, ќе очекуваме брзи резултати, но тие не доаѓаат така лесно. Но јас сум оптимист и верувам.
8. Дали би сакал утре да видиш што поголем број луѓе кои ќе дојдат на твојата изложба да дојдат со точаци ?

- Да, да како не! И би им порачал што повеќе да конзумираат уметност, современа ликовна уметност, и да видат еден интересен и поинаков субјективен пристап на доживување на нештата, меѓу кои и овој урбан настан. Се надевам дека преку мојата инсталација ќе успеам да ја пренесам енергијата што ја доживеав јас на тој настан и врз луѓето што се дојдени на изложбата. 

9. Дали доаѓаат луѓе на изложби со точаци?

До сега ретко, можеби двајца, тројца поединци, некои ептен љубители на точаци, но не сум видел поголема група на точаци на изложба. А ова мислам дека би било баш интересно, надоврзување на концептот, кое ќе ги иницира да доаѓаат. Има минијатура или дело кое ќе ги презентира нив, меѓу другото самата критична маса, како и луѓето воопшто, а исто има и луѓе кои се дел од целиот концепт кои доаѓаат на самата изложба и тоа со намера, со некоја мала рута, вонредна рута и нешто слично. Да, а баш би било интересно на ликовен настан да се дојде со точаци, односно да има критична маса или еден вид поврзување на повеќе светови.

27 August, 2013

Извештај од средбата со Град Скопје

После упатените барања за подобрување на постоечката велосипедска инфраструктура до сите скопски општини и Градот Скопје, првиот одговор го добивме од администрацијата на Град Скопје после што беше договорена средба. 

Средбата се оствари на 20.08 од 10:00 до 11:00 часот во просториите на Град Скопје каде присуствуваа претставници од На Точак и претставници од Секторот за планирање и уредување на просторот и од Одделението за спорт. За 
жал, на средбата немаше претставник од Секторот за сообраќај, но присутните ветија дека ќе им ги пренесат заклучоците на своите колеги.

На средбата подетално им ги презентиравме веќе упатените барања и целата наша заложба за промовирање на велосипедот како транспортно средство и за подобрување на условите за негово користење. 

Вработените од Град Скопје, од кои сите (помалку или повеќе) корисници на велосипедот, беа согласни дека се работи за реални проблеми со кои се соочуваат велосипедистите и за реално остварливи барања, кои ќе може постапно да се решаваат. 

Најмногу се задржаа околу првото барање: Подобрување на состојбата на постоечките велосипедски патеки кое е најдиректно во надлежност на Град Скопје и е поле на кое веќе работат со заменување на високите рабници со ниски. Ние им укажавме дека ниските рабници се во секој случај подобри од високите, но најдобро решение се рампи, и за велосипедските патеки и за пешачките кои треба да бидат пристапни и за лица во инвалидски колички. Состојбата со одржувањето на асфалтот на патеките им е јасна, но досега приоритетите биле насочени кон реконструкција на коловозите за моторен сообраќај.


Во врска со второто барање: Овозможување на континуирано движење по велосипедските патеки ни беше објаснето дека во некои случаи е невозможно да се дислоцираат веќе поставени објекти како семафори и сл. поради инфраструктурните поврзувања, но секако дека во иднина може да се планира подобро. Проблемот со автобуските постојки и судирот на велосипедскиот со пешачкиот сообраќај им е јасен и ќе мора да се пристапи кон нови сообраќајни решенија кои ќе ги издвојат овие 2 типа сообраќај, како и соодветно обележување на патеките и поставување на сообраќајни знаци кои ќе ја подигнат свеста на граѓаните за постоењето на велосипедските патеки. Проблемот со паркирани возила е во надлежност на МВР и најмногу што може да направи Град Скопје е да постави столпчиња, онаму каде што е можно, кои ќе спречат нерегуларно паркирање на возила на велосипедски и пешачки патеки, како и да го искомуницираат проблемот на повисоко ниво. 


Третото барање за Зголемување на бројот на паркинг места за велосипеди, им го претставивме како задолжителен потег на сите јавни институции со кој ќе изразат поддршка кон сите вработени и посетители кои го користат велосипедот како превозно средство. Од Град Скопје рекоа дека ќе преземат иницијатива оние институции кои се во нивна надлежност (беа спомнати средните училишта како пример) да се снабдат со ваков вид паркинзи. Стана збор и за издвојување на едно до две паркинг места за автомобили на секој јавен паркинг и нивно пренаменување во паркинг места за велосипеди. Така тие места ќе добијат и соодветен надзор и заштита од крадење.


Им ги понудивме резултатите од нашите мапирања и од претходно спроведени акции (претставени и на средбата со ЈП Улици и патишта) како база за согледување на проблемите. Ветија дека ќе пратат екипи кои ќе направат увид на терен и во зависност од буџетот ќе одредат приоритети за решавање.

За дел од проблемите им доставивме позитивни примери од светот како можен начин на решавање, а за останатите проблеми стоиме на располагање за консулатација како секојдневни корисници на велосипедот како превозно средство.


Град Скопје веќе работи на некои проекти за спортски велосипедизам, но урбаниот велосипедизам, велосипедот како начин на транспорт низ градот, заклучивме дека е запоставен и долго време се нема направено ништо во Скопје на таа тема. Добивме уверување дека постоењето на ваква иницијатива сигурно ќе направи мало поместување на приоритетите. Постои волја за подобрување, но бидејќи и решенијата треба да се долгорочно применливи, не треба да очекуваме резултати веднаш.  


Може да сметаме дека Град Скопје е известен со какви проблеми се соочуваме при секојдневното сообраќање низ градот. Наше е да очекуваме конкретни мерки за нивно решавање и да реагираме секогаш кога ќе забележиме дека нешто што не е во ред, како нашиов сограѓанин (или тука). 
Со зголемено комуницирање на одредена тема, надлежните ќе сфатат дека им е важна на навистина голем број граѓани. Да продолжиме да реагираме. Велосипедот како транспортно средство треба да го добие местото во градските политики кое го заслужува .

21 August, 2013

Критична маса #16: Локално разладување против глобално затоплување

Датум: 28.08.2013
Тргнување: 17:30, пред парк за кучиња, Градски парк

Дружба и пикник на крај: ~19:00, СРЦ Сарај

Промотивни материјали: линк.
Facebook настан: линк.
Рута: линк.

Известување до медиуми: линк.

постерот за КМ 16

Сте почувствувале ли како чади скопскиот асфалт под влијание на директното загревање од возилата?
Индиректно стакленичките гасови го параат озонот, а тоа дополнително ни се враќа преку нестабилно време, екстремни температури, еколошки и социјални последици...

Истовремено, постои едно превозно средство кое не согорува фосилни горива при користењето, редуцира CO2, работи на наш погон, подобрува кондиција! 

За велосипеди и велосипедска инфраструктура  во споредба со другите превозни средства се трошат помалку енергија и ресурси и помалку се загадува при: производство, трговија, изведба, користење, одржување.
Велосипедските патеки и паркинзи зафаќаат помалку место и оставаат повеќе простор за „дивина“, повеќе сенки и кислород за природна климатизација, помалку загревање на улици на сметка на вештачко ладење.

Со коли по асфалт е пеколно, на точак под дрвја е пријатно...
Ајде на точак! Ајде заедно!

Со Критична маса 16 ќе поврземе два паркови по булевари по кои (треба да) има велосипедски патеки и дрвореди. Придружи ни се да бидеме побројни и повидливи.
Да инспирираме возењето точак како превозно средство да дојде на дневен ред во животите на нашите сограѓани и во сликата за Скопје на одговорните!

Ќе се движиме по следнава рута: 


View Предлог КМ16 in a larger map

и ќе поминеме 11км заедно низ скопските улици.

Секојдневните патувања на најголем дел од граѓаните во Скопје се многу помали и тука постои огромен потенцијал за користење на велосипедот како превозно средство.
Не ни е позната статистиката кај нас, но европскиот просек вели дека: 30% од патувањата се до 2км, а 50% до 6км. Изборот на автомобилот за превоз на овие кратки дестинации понекогаш е ирационален. Проширувањето на улици со цел да се намали сообраќајната гужва, а невложувањето во вело-инфраструктура е исто така ирационално, особено во денешните услови на глобално затоплување.

Никоја локална заедница не може сама да направи ништо. Но нема да почне промената се’ додека локалната заедница не направи нешто. Не можеме да ги спречиме климатските промени, но место да ги помагаме, можеме сериозно да ги ублажиме ако, меѓу другото, го сфатиме велосипедот како сериозно превозно средство. CO2 најлесно може да се редуцира со менување на приоритетите во сообраќајот во споредба со други области, и до 14 %.


Се гледаме на Критична маса #16!

Ширинката на која се чекаме во парк (десно на фотографијата),
меѓу паркот за кучиња и дискотеките

Паркингот пред општина Сарај,
местото каде ги подигнуваме точаците,
пред да се упатиме на пикник во паркот

*Секој учесник вози на своја одговорност.
*Понесете си работи за пикник.
*Oрганизирано враќање до центар ~20:30.

Промотивни материјали - #КМ16

[дизајн: Гоце Митевски]

Постер, А3:

постер, верзија за веб (jpg)
Постер, линк до верзија за печатење, во боја, А3 (pdf)

Флаер, А6:
Флаери, линк до верзија за печатење, црно-бело, 4 на А4 (pdf)
флаер, А6, верзија за веб, предна страна, b&w
флаер, А6, верзија за веб, задна страна, b&w
флаер, А6, верзија за веб, предна страна

флаер, А6, верзија за веб, задна страна


Банери:

веб-банер 300x250
веб-банер 980x750
веб-банер 900x800
веб-банер 980x100
веб-банер, 851 x 315 (FB cover)
аватар, 180x180
Промотивните материјали од овој блог- пост може слободно да се споделуваат и печатат, да се користат во рамки на објави за настанот или како линкови.
Однапред благодариме на помагањето да се прошири информацијата за Критична маса #16.

15 August, 2013

Барања за подобрување на постоечката инфраструктура за урбан велосипедизам во Град Скопје

Веќе 15 месеци возиме заедно по улиците на град Скопје и покажуваме дека во Скопје има многу граѓани кои се превезуваат на точак, дека велосипедскиот сообраќај е важен и перспективен дел од сообраќајот и дека за негово безбедно и удобно одвивање мора да се обезбедат соодветни услови.

Она што досега го имаме забележано како проблем со постоечката инфраструктура преку секојдневното возење велосипед низ Скопје, преку анкетата спроведена минатата година, преку искуствата споделени од наши сограѓани на профилите на НаТочак на социјалните мрежи и мини-истражувањето кое го направивме за средбата со ЈП Улици и патишта, го систематизиравме во неколку барања за подобрување на условите.

Неколку активисти со своите велосипеди минатите денови ги обиколија сите скопски општини и градот Скопје и го доставија документот со барањата во печатена верзија. Единствено во општина Шуто Оризари поради годишните одмори не можеа да добијат печат, па писмото е доставено преку пошта. 
Исто така, документот е доставен до сите општини и во електронска форма.
Во прилог се линкови до писмото со заверен архивски печат доставени до општините:


Целосна верзија на писмото може да се погледне во текстот подолу или во верзија на документ на следниот линк.
Се надеваме на позитивен одговор од страна на надлежните институции преку конкретни мерки.



До:
Општина _____________,
г/г-ѓа _____________, Градоначалник на општина _____________
Предмет:
Предлог за подобрување на постоечката инфраструктура за урбан велосипедизам во Град Скопје


Почитуван/а г/г-ѓа _____________,

Велосипедскиот сообраќај претставува високо-ефикасен начин на урбан транспорт. Тенденцијата на раст на велосипедски сообраќај долгорочно придонесува за зголемена економска, здравствена и еколошка корист. Бројот на велосипедисти во Скопје континуирано расте, а со тоа се зголемуваат и потребите за подобра инфраструктура.

Од месец мај 2012 година, секој месец се одржува настанот „Критична маса“ каде ние, група велосипедисти, возиме заедно по скопските улици со цел актуализација на проблеми со кои секојдневно се среќаваме. Вкупно околу 3700 велосипедисти или во просек по 245 велосипедисти месечно возиме на секоја „Kритична маса“.

Граѓаните кои возат велосипед се учесници во сообраќајот. Како такви имаат потреба за соодветен простор во рамки на улиците. Градот Скопје веќе располага со одредена велосипедска инфраструктура. Со нејзиното подобрување и оспособување за користење ќе се зголеми безбедноста и удобноста во движењето на активните корисници и ќе се мотивираат нови корисници на велосипедот како превозно средство.
Врз основа на претходни анализи, воочени се проблеми во велосипедскиот сообраќај за кои сметаме дека постои можност за нивно решавање.

Бараме да се подобрат условите за возење велосипед во град Скопје преку:

1.    Подобрување на состојбата на постоечките велосипедски патеки
Редовно одржување на велосипедските патеки во поглед на санација на дупки, пукнатини и нерамнини на патеките. Систематско нивелирање на патеките преку порамнување на рабници, шахти и одводни канали (сливници) со цел овозможување глатко движење. Обновување на хоризонтална и вертикална сигнализација и поставување нова каде што отсуствува, со конзистентен изглед. Обележувањето на патеките треба да го следи природниот тек на движење и да се избегнуваат нагли свртувања, особено на крстосниците.

2.    Овозможување на континуирано движење по велосипедските патеки
Дислоцирање или заобиколување на мобилни и фиксни пречки од патеките како што се: паркирани возила, контејнери, билборди, семафори, сообраќајни знаци и автобуски постојки. Потребно е редовно чистење на патеките од отпад, стакло, трње, мраз, снег, трева и виснати гранки. Справување со проблемот каде пешаците ги користат велосипедските патеки.

3.    Зголемување на бројот на паркинг места за велосипеди
Обезбедување видливи и функционални паркинг места за велосипеди под надзор пред јавни институции и на јавни простори.

Сметаме дека подобрувањето на постоечката инфраструктура е неопходна основа за понатамошен развој на велосипедскиот сообраќај.

Во перспектива на долгорочен и одржлив развој на велосипедскиот сообраќај, би можеле да се следат позитивните практики од развиените градови:

     проширување на велосипедската мрежа преку градење нови велосипедски патеки, следејќи ги стандардите за изградба на истите
     воведување зони на намалена брзина на движење на моторните возила, онаму каде што нема просторни услови за нови велосипедски патеки,  со цел безбедно заедничко сообраќање на возачите на моторните возила и велосипедите
     континуирано одржување, подобрување и проширување на јавниот систем за изнајмување велосипеди
     интегрираност на велосипедскиот со јавниот транспорт за овозможување на комбинирани патувања што ќе го зголеми користењето и на велосипедот и на јавниот транспорт за патувања за кои вообичаено не би се користеле
     воведување статистика за следење на учеството на велосипедскиот во вкупниот сообраќај во градот итн.

Постоечката велосипедска инфраструктура во Скопје не е доволно искористена поради состојбата во која се наоѓа. Нејзиното подобрување треба да биде приоритет. Развојот на велосипедскиот сообраќај креира многубројни позитивни ефекти кои имаат влијание врз целокупното урбано живеење.

Неформалната група „НаТочак” се залага за подобрување на условите во велосипедскиот транспорт во град Скопје. Ги идентификуваме конкретните проблеми со кои се среќаваме и укажуваме на истите со цел нивно надминување. Од општ интерес е да се пресретнат потребите на учесниците во велосипедскиот сообраќај.

Благодариме на вниманието. Се надеваме на позитивен одговор на барањата преку конкретни мерки.


Со почит,
Неформална група велосипедисти - наТочак


*Овој документ е испратен во печатена и електронска форма до општина Аеродром, Бутел, Гази Баба, Ѓорче Петров, Карпош, Кисела Вода, Сарај, Центар, Чаир, Шуто Оризари и до Град Скопје.