Пријава на инфраструктурен проблем – уништена велосипедска патека поради работа со тешка машинерија

На 22.јули испративме пријава до Град Скопје и до ЈП Улици и патишта за уништување на велосипедската патека на Партизанска поради невнимателна работа со тешка машинерија.

Пријавата како .pdf документ е достапна на линкот, а како текст во продолжение. 

Подетален и посликовит опис на проблемот има во албумот на Facebook, достапен на овој линк. Албумот е објавен на 31. јули, откако 9 дена после пријавата, уништувањето на патеката продолжи.

-------------------------

До:                          Град Скопје
 
Сектор за уредување и просторно планирање
 
Предмет: Пријава на инфраструктурен проблем – уништена велосипедска патека поради работа со тешка машинерија
 
 
 
ПРИЈАВА
 
Почитувани,
 
На ден 22.07.2020 год. пријавуваме уништување на велосипедска патека од тешка машинерија, која моментално работи на бул. Партизански Одреди, од бул. Френклин Рузвелт до ул. Никола тесла. Сликите се од пред поранешно Симпо во Карпош 1.
 
Во прилог слики:

Бараме итен прекин на работата со тешка машинерија и санација на настанатите дупки, која освен ако не се копа целосно од почеток до крај на потегот на кој се работи, никогаш нема да може да се врати во првобитната состојба.

Понатаму, на овој потег е потребно да се направи заобиколување на автобуската постојка која е веднаш до местото на кое сега се работи. Предлагаме сега да се искористи можноста за изведување на потребното заобиколување и санација на уништениот асфалт на велосипедската патека.
 
 
 
Со почит,
Неформална група на велосипедисти НаТочак
natochak@gmail.com
22.07.2020
 
Скопје
*Овој документ е испратен во електронска форма до Град Скопје и ЈП Улици и Патишта.

Read more »

Допис за прекин на патеката на кејот на Вардар за мост на бул.АСНОМ

Денес, 23.03.2020 НаТочак испрати допис до Град Скопје во врска со прекинот на велосипедската патека на кејот на Вардар во општина Аеродром поради извршување на градежни работи за мостот на бул. АСНОМ, а без изведено заобиколување. Дописот е достапен во .pdf облик на следниот линк, а како текст во продолжение: --------------------------- Скопје, 23.03.2020
До: Град Скопје

Сектор за уредување и просторно планирање

Предмет: Пријава на инфраструктурен проблем – прекин на кејот за мост на бул. АСНОМ Почитувани,

По реакциите на многу граѓани до нас, би сакале да ве известиме за непочитување на точка 2.1.4 Воведување на обврска за задолжително обезбедување на алтернативни површини за пешачење и возење на велосипед при изведување на градежни работи на пешачки и велосипедски површини

од Планот за унапредување на велосипедски сообраќај кој Советот на Град Скопје го усвои во септември минатата година, при изведување на градежните работи за мостот на булевар АСНОМ.

Ова е извадок од Акцискиот план:

а целиот план е достапен на вашата веб-страница:

https://skopje.gov.mk/media/4370/predlog-plan-za-unapreduvanje-na-velosipedski-soobrakaj-2019-2021.pdf

Велосипедската (и пешачката) патека по кејот на Вардар се моментално целосно прекинати без обезбедување на алтернативни патеки (слика во прилог).

Тараби на кејот на Вардар при изведување на
градежните работи за мостот на булевар АСНОМ

Граѓаните од општина Аеродром кои го користат велосипедот како превозно средство според слободни проценки (а кои може лесно да се докажат доколку би имале мерачи на клучни локации) дури и повеќе го користат кејот за да стигнат до центар од булеварските патеки.

Ова е особено значајно во периодот на здравствената криза со брзината на ширење на Ковид-19 кога секој велосипедист е битен заради намалување на гужвата во јавниот превоз. Многу градови апелираат на поголемо користење на велосипедот кај оние граѓани кои можат да го прават тоа, за да се намалат гужвите во јавниот превоз. Некои градови (како Богота, н.з.) дури и обезбедуваат привремени велосипедски патеки. Нашиот град не смее да ги прекинува најактивните патеки било кога, а особено не среде ваква криза.

Во моментов граѓаните од Аеродром без никакво навремено известување за градежните работи, без никакви насоки како да заобиколат, се принудени да стигнат до самите тараби и да се враќаат назад до првите скали и да го носат велосипедот во раце, а не секој кој го користи велосипедот како превоз го може тоа. Не треба да ви посочуваме какво демотивирање е тоа и како долгорочно ќе се одрази на развојот на велосипедскиот сообраќај во нашиот град. 

Бараме според зацртаните планови на Градот, во овој и во сите идни проекти, да не смеат да се прекинат велосипедски патеки, да не смеат да започнат градежни работи од изведувачите додека навремено не се обезбеди известување со соодветна сигнализација за насоки на движење, како и изведено безбедно заобиколување.

Дополнително, во точка 2.2.2 од истиот план: 2.2.2.Изработка на план за унапредување и проширување на велосипедската мрежа во Скопје за периодот 2020 – 2021 

има потточка која гласи:  интегрирање на патеката по должината на реката Вардар преку рампи и мостови.

Очекуваме идниот мост покрај што е најавено дека ќе има велосипедски патеки, да има и поврзување со патеката по текот на Вардар со возливи рампи. 

Тие рампи можеше да се изградат пред изградбата на мостот и да послужат како возливи врски по текот на заобиколувањето и додека траат градежните работи. 

Во врска со тоа, би сакале да ве потсетиме и на точките 3 и 7 од Меморандумот за соработка кој НаТочак го потпиша со градоначалникот Петре Шилегов во 2017 година (тогаш кандидат):

3. Новата градска администрација се обврзува да вклучи задолжителни велосипедски простори и патеки во секое идно проектирање на нова улица, булевар или мост.

7. Итно деблокирање на постоечките велосипедски патеки кај плоштад Македонија, патеката на кејот на Вардар и Стоковна Куќа Мост, создавање на повеќе рампи за приклучување кон патеката на кејот како и нејзино продолжување накај Сарај и Јурумлери.

Целиот меморандум, можете да го прочитате тука: https://natochak.blogspot.com/2017/10/blog-post_15.html

Согласно официјалниот План за унапредување на велосипедски сообраќај на Град Скопје и согласно Меморандумот за соработка потпишан со градоначалникот Петре Шилегов, се чини дека сфатено е големото значење на патеката по кејот на Вардар за Скопје.

Бараме тоа да се покаже и во пракса.

Доколку се уште не се започнати градежните работи, бараме да се тргнат тарабите до моментот на обезбедување рампи и безбедно и означено заобиколување за велосипеди и пешаци.

Доколку се започнати градежните работи, бараме итно делување со поставување рампи за туркање на велосипеди и соодветна привремена сигнализација и насочување, а во догледно време (наредниве месеци) и подобро пофункционално решение со возливи рампи, бидејќи велосипедскиот сообраќај и кејот не смеат да страдаат во наредните години додека се вршат градежните работи како што беше случајот (и се уште е) со прекинот кој го направи мостот за Панорамското тркало и сите останати мостови во проектот Скопје 2014.

Исто така, со цел вакви проблеми да не се повторуваат во иднина, бараме да испитате како се издала дозвола за извршување на градежни работи врз функционална велосипедска патека, без да се изведе вакво заобиколување.

Со почит,

НаТочак

23.03.2020

Read more »

Допис за виснатите гранки над велосипедските патеки

Сакаме дрвја покрај и над пешачките и велосипедските патеки (Критична маса #74: Дрвјата се наша клима ја посветуваме на нив), но за да гледаме само корист од нив, а не штета, во урбана средина, тие мора да се одржуваат.
За да не бидат практична и безбедносна пречка ниско спуштените гранки и раширените грмушки, реагиравме повеќе пати до надлежните служби од Паркови и зеленило и Град Скопје, со пораки и повици, а овојпат и со официјален допис.

Дописот како текст го има во продолжение, а како документ е достапен на следниот линк.

Споделуваме и видео како изгледа да се вози точак по една од споменатите патеки, на бул. Партизански одреди.

--------------------------------

Почитувани Град Скопје, ЈП Паркови и Зеленило и Државен Инспекторат за Транспорт,

На најпрометните велосипедски сообраќајници во Град Скопје (бул. Јане Сандански, бул. Кузман Јосифовски - Питу, бул. Партизански одреди, бул. Александар Македонски, бул. Илинден) во изминативе месеци, и покрај неколку наши реакции, континуирано се влошува ситуацијата со гранките од дрвјата кои се виснати над велосипедските патеки и гранките од грмушките кои се во ширина на патеките. На некои места тие веќе се наоѓаат на висина од 100-150 cm од патот, или покриваат голем дел од неговата ширина, со што не само што го прават сообраќањето со велосипед непријатно, туку веќе и сериозно ја загрозуваат безбедноста на овој тип учесници во сообраќајот. Во истиот период службите на градот се грижат за тревата долж овие булевари и ги кастрат гранките на дрвјата во средишното зеленило.

Слика 1: Ниски гранки над велосипедска патека на бул. Партизански Одреди

Наведените сообраќајници се под надлежност на Град Скопје и нивните инспекциски служби.
Согласно член 2 став 2 од Законот за јавни патишта, „Функција на јавните патишта е
обезбедување на безбеден и непречен превоз на стока и патници во патниот сообраќај.“ Според член 69 од овој Закон, општинските инспектори за патишта на Град Скопје се овластени да „наредат отстранување на недостатоците на јавните патишта кои ја загрозуваат безбедноста на сообраќајот.“ Јавните патишта (или само патишта) во истиот закон се дефинирани како „сообраќаен објект на кој се врши сообраќај“ и во оваа дефиниција влегуваат и велосипедските патеки.
Поради ова, ја повикуваме Инспекцијата за патен сообраќај и инспекцијата за патишта да излезе на терен, да ги идентификува недостатоците на велосипедските патеки кои ја загрозуваат безбедноста на оваа група учесници во сообраќајот, да даде налог за отстранување на овие недостатоци до релевантните институции и тој налог да се спроведе во најбрз можен рок.

(Забелешка: иако нема подзаконски акт кој регулира колкав треба да биде слободниот вертикален простор за безбедно сообраќање по велосипедска патека, препорачана минимална висина е околу 220 cm, а оптималната со која би се намалила и фреквенцијата за редовно одржување е околу 250 cm.)

Со почит,
Неформална група на велосипедисти НаТочак
natochak@gmail.com

27.06.2018
Скопје

*Овој документ е испратен во електронска форма до Град Скопје, ЈП Паркови и Зеленило и контакт лица од Градски инспекторат

Read more »

Пријава на инфраструктурен проблем : мешани пешачко-велосипедски патеки долж Бул. Кочо Рацин

На 13.09.2017 до Координативното тело за урбан велосипедизам НаТочак упати допис во врска со почетокот на градежните работи на бул. Кочо Рацин.
За истиот булевар беше разговарано и усно, но НаТочак сакаше да остане запис во облик на пријава од официјалниот став.
Па еве го во продолжение како текст или како документ на линкот.
--------------------

До: Град Скопје
Координативно тело за урбан велосипедизам
Предмет: Пријава на инфраструктурен проблем мешани пешачко-велосипедски патеки долж Бул. Кочо Рацин

ПРИЈАВА

Почитувани,
Би сакале да изразиме загриженост и незадоволство во врска со градежните работи кои деновиве се извршуваат на бул. Кочо Рацин, поточно на тротоарите.
Реакцијата ни е малку задоцнета бидејќи за жал, повторно дознаваме за реконструкцијата од терен бидејќи не беше истакнат планот за реконструкција пред да започнат градежните работи. Независно од тоа, се надеваме дека ги земете нашите забелешки предвид.

Градежни работи на терен

Според она што можевме да го разбереме од сајтот на Град Скопје (линк до веста), со оваа реконструкција нема да се смени дизајнот на улицата, нема да добие посебни велосипедски патеки, туку постоечките тротоари чиј асфалт ќе се смени ќе станат мешани пешачко-велосипедски патеки.
Булеварот Кочо Рацин е дел од Големиот ринг кој го обиколува најцентралното подрачје на градот и како таков е многу важен за сите типови сообраќај, не само за автомобилскиот. Тој ги поврзува во прстен сите планирани велосипедски рути на исток, запад и север од центарот. Дури и според мапата на проектот Скопје вело-град, на оваа делница е покажано дека ќе се направи посебна велосипедска, а не пешачко-велосипедска патека (означено е со црвено, а не со сино).

мапа на Скопје велоград проектот

Имено, со овој допис сакаме да посочиме на можноста за поинакво решение на улицата.
Штом се вложуваат големи јавни средства, сметаме дека треба попатно да има и подобрување на решението, а не само промена на асфалтот.
Моментално булеварот има во секоја насока по 3 широки коловозни ленти (широки по 3.5 метри секоја, т.е. вкупно 10.5 метри) и една мешана пешачко-велосипедска патека широка 2.8 метри која минува низ автобуска постојка. За град кој претендира да се нарече вело-град и кој веруваме сака да го поттикне покрај возењето велосипед и пешачењето како здрав и незагадувачки начин на движење низ градот, ова не е добра слика и праведен сооднос на просторот и не соодветствува на заложбите.

Истовремено, на овој булевар се вози значително брзо токму поради големата ширина на лентите која не е соодветна за градски брзини до 50 km/h, туку поттикнува поголеми.
Докажано е дека дизајнот на улиците е силен фактор за безбедно или небезбедно однесување многу повеќе од бројките за брзински ограничувања на сообраќајните знаци. Според студија направена во Токио и Торонто, потесните ленти резултираат со неагресивно возење и со можност да се сопре навреме и да се избегне судир, и истовремено не влијаат на намалување на капацитетот на улицата за примање коли, напротив. Додека на пошироките ленти, возачите се чувствуваат комотно да го надминат ограничувањето и почесто се случуваат сообраќајни судири со последици.
Претпоставката дека пошироките ленти се побезбедни не важи за градска средина и тоа се потврдува со се' повеќе емпириски податоци. (референци 1, 2)

Затоа сметаме дека решение за двата проблеми:
1. брзото возење на автомобилите
2. непостоење на издвоени велосипедски и пешачки патеки
ќе биде стеснување на автомобилските ленти од 3.5 на 3 метри и добивање на 1.5 метар за велосипедска лента, наместо постојното решение со кое патеката треба да навлезе во зеленилото и сепак ќе биде од понизок стандард, т.е. мешана пешачко-велосипедска.
Со нашиот предлог нема ни да се намали капацитетот за примање на возила, туку само ќе се зголеми безбедноста на булеварот за сите учесници во сообраќајот.

Апелираме употребата на коловозни ленти со ширина од 3 метри, наместо 3 и пол метри да стане пракса во сите изградби на нови булевари и при реконструкција на постоечките. Просторот добиен со новата распределба (т.н. Road diet, патна диета), може да се користи за пешачки, велосипедски патеки или зеленило (намени кои недостасуваат и му се неопходни на градот, особено ако се стремиме тој да станува пријателски за велосипеди и пешаци) зависно од тоа што недостасува во контекстот.

Апелираме да се размисли и за специјализирање на најдесната од трите коловозни ленти за јавен превоз како во сите градови кои се залагаат за одржлив сообраќај.

Улиците во Скопје треба да се дизајнираат да бидат безбедни и со градски, а не со автопатски карактер.
Секоја реконструкција на било која улица треба да се искористи како шанса да се преосмисли дизајнот на улицата, да се направи побезбедна за сите учесници во сообраќајот, а не само да се смени асфалтот.

Со почит,
НаТочак

13.09.2017

Референци:
1. Линк до статија: “Лентите широки 3 метри се побезбедни и сепак имаат капацитет за многу возила“
https://www.citylab.com/solutions/2015/07/10-foot-traffic-lanes-are-saferand-still-move-plenty-of-cars/399761/
2. Линк до Препораките за ширина на ленти на Националната агенција за градски транспорт на Америка:
https://nacto.org/publication/urban-street-design-guide/street-design-elements/lane-width/

Read more »

Пријава на возила на спортско-рекреативната патека на кејот на Вардар

После забелeжаната фотографија на off.net.mk и реакциите кои ги добивме од повеќе сограѓани велосипедисти, испративме пријава до надлежните институции во врска со несоодветно користење на патеката на кејот. Ова не е првпат да се користи патеката на кејот со моторни возила, но е првпат да забележиме толку тешко возило.
Текстот од пријавата го има во продолжение, а како документ на линкот.
----------------------------------
До: Град Скопје
г. Коце Трајановски, Градоначалник на Град Скопје,
Општина Аеродром
г. Ивица Коневски, Градоначалник на Општина Аеродром
Општина Карпош
г. Стевче Јакимовски, Градоначалник на Општина Карпош

Предмет: Пријава на инфраструктурен проблем: Возила на спортско-рекреативната
патека на кејот на Вардар

ПРИЈАВА

Почитувани г. Трајановски, г. Коневски и г. Јакимовски,

На ден 30.03.2017 год. пријавуваме проблем поради присуство на возила на спортско-рекреативната патека на десната страна на кејот на реката Вардар.
Веќе подолго време можат да се сретнат моторни возила кои сообраќаат на патеката која е наменета за спортисти и рекреативци, а истата ја користат и луѓе кои со немоторни превозни средства се движат по неа за да ги избегнат сообраќајниците и градскиот метеж. Овие возила очигледно влегуваат на патеката бидејќи недостасуваат пречки во форма на столпчиња на влезовите на патеката.
Возилата освен што ја загрозуваат безбедноста на спортистите и рекреативците придонесуваат и на уништувањето на патеката со нивната повеќе тонска килажа.

Во прилог фотографија од камион на патеката во Аеродром (следната страна).

фотографија од off.net.mk

За нас, а веруваме и за вас како промотори на урбаниот велосипедизам, оваа појава е
неприфатлива.
Ве молиме за најитно решавање на овој проблем, за да се овозможи безбедно движење во најкраток можен временски рок.

Со почит,
Неформална група на велосипедисти
НаТочак

natochak@gmail.com
30.03.2017
Скопје

*Овој документ е испратен во електронска форма до сите три општини

Read more »

Допис до Град Скопје за чистење на велосипедските патеки од снег

Во врска со попреченото движење (од неисчистениот снег и мраз) на велосипед во Скопје, НаТочак испрати допис до надлежните од Град Скопје.
Дописот како документ е достапен на следниот линк, или како текст, во продолжение:

-------------------------

До

Град Скопје     

                                                                   

Почитувани,

Неформалната група НаТочак, промовираjќи ги сите предности од велосипедот како урбано секојдневно превозно средство, кое се користи 365 дена во годината, Ви се обраќа во врска со актуелните снежни врнежи во градот Скопје.

Деновиве сведоци сме дека чистењето на велосипедските патеки од снег и мраз не е воопшто предмет на работа на службите. Како и во минатото, така и оваа година, снежните врнежи, потпомогнати од инертноста на надлежните (кои не го чистат снегот од патеките) комплетно го блокираа велосипедскиот сообраќај во градов и го прават тотално небезбеден. Со блокираните и небезбедни патеки ги демотивираме и оние посветени велосипедисти на кои студот не им пречи. Наместо да имаме чисти патеки и да правиме кампањи за поголемо користење на велосипедот при ладно време, со моменталната ситуација правиме и најупорните да се откажат.

Имено, во град каде возењето велосипед се смета за сообраќај, рамноправен со останатите видови, град кој се декларира и стреми кон вело-ориентиран, град кој заговара да прерасне во ВелоГрад (а актуелно и реализира таков проект, Скопје Велоград 2017), чистењето снег на вело-патеките е подеднакво важно како и чистењето снег на коловозот.

Во прилог фотографии од неисчистени велосипедски патеки низ Скопје

Апелираме намерата на градските власти, Скопје да стане велосипедски град, целосно да се имплементира, односно да се манифестира и преку чистење на вело патеките за непречено сообраќање на велосипедистите за време на снежни врнежи.

Дополнителен мотив треба да биде енормно загадениот воздух во зимскиот период и потребата да се поттикне незагадувачки сообраќај, создавајќи соодветни услови за тоа.

Очекуваме одговор во врска плановите на Градот по однос на ова прашање.

Со почит,

НаТочак

Read more »

Пријава на инфраструктурен проблем - понизок и пропаднат асфалт на велосипедска патека - бул. Илинден

НаТочак испрати пријава до Координативното тело за урбан велосипедизам при Град Скопје во врска со воочен проблем на Рута 1 од проектот “Скопје Велоград 2017“ - понизок и пропаднат асфалт. Се надеваме проблемот навремено ќе се санира со цел да се заштити патеката од натамошно оштетување. Исто така се надеваме дека овој апел ќе влијае да се пристапи со поголемо внимание при изведбата на останатите рути од проектот.
Документот кој е испратен до Координативното тело е достапен на линкот, а текстот од пријавата заедно со фотографиите ги има и во продолжение.
-----------------------------------

 

До: Град Скопје

Координативно тело за урбан велосипедизам

 

Предмет: Ревизија на Рута 1 од проектот ”Скопје Велоград 2017”

                 Проблем со понизок и пропаднат асфалт

 

 

Почитувани,

Ви се обраќаме во врска со еден проблем кој почна да се јавува по текот на Рута 1 од проектот “Скопје Велоград 2017“ и за кој стравуваме дека доколку навреме не се преземе нешто, ќе има сериозни последици по употребливоста на патеката.

Патеката се пушти во употреба и имаше многу пофалби од граѓаните, но со тек на време почнаа да се покажуваат дел од пропустите при изведбата. Имено, се работи за следното: 

Патеката на потегот од Општина Центар до ул. Љубљанска има 2 насоки поставени од јужната страна на бул. Илинден. Една насока запад-исток покрај коловозот и една насока исток-запад на внатрешната страна од зеленилото.

Патеката во насока запад-исток е главно со стар нереконструиран асфалт, од затекнатата велосипедска патека (на некои места многу брановиден), а патеката во насока исток-запад е нов асфалт кој беше рамен и многу пофалуван од велосипедистите поради глаткоста. 

За жал, оваа патека е изведена на исто ниво или под нивото на зеленилото (тревникот) и иако го има соодветниот наклон за исцедување кон него, поради пониската кота, создава редица проблеми кои почнаа да доаѓаат до израз после последните дождови:

-       и при мал дожд се собира вода во десетици вирови по текот на патеката

-       водата нема начин да истече зашто земјата е на повисока точка од патеката

-       водата тешко испарува бидејќи овој дел е цело време под сенки (исто така многу преферирани од велосипедистите во летните месеци)

-       долгото стоење на водата предизвикува натамошно слегнување на асфалтот и оформување на вдлабнатини кои со тек на време ќе собираат сè повеќе и повеќе вода.

-       поради слегнувањето на асфалтот многу веројатна е и појавата на пукнатини

-       кога водата конечно ќе се исуши останува земја на патеката која е подлога за растење на треви

-       на некои места од патеката веќе имаат изникнато треви кои можат сериозно да го разјадат асфалтот 

(На крајот на овој допис има посебен прилог со фотографии oд наведените проблеми)          

 

Со почесто чистење на патеката (после секој дожд) може да се ублажи проблемот.

Сепак, би замолиле за трајно решавање преку:

- симнување на нивото на почвата за неколку cm (онолку колку што е потребно за да биде пониско зеленилото од велосипедската патека) со цел при дождливо време водата од патеката да се исцедува во зеленилото, а на обратно, од зеленилото на патеката

- да се подигне нивото на патеката со нанесување на уште еден слој асфалт врз патеката.

- поставување на повисок рабник меѓу зеленилото и патеката може само да ги помогне горните решенија, но не веруваме дека може целосно да го реши проблемот.

Ја користиме оваа прилика и да апелираме да се посвети должното внимание при изведбата на останатите велосипедски патеки. Кога веќе се вложуваат средства и време, нека се посвети поголемо внимание околу квалитетот на изведба на патеката, и од надлежните инженери и од оние кои директно изведуваат, за да се направат нештата квалитетно и да бидат долготрајни, наместо да се санираат секоја година.

Можеби треба да се обрне внимание и на подобро тампонирање на подлогата.
 

Предлагаме членовите на координативното тело за урбан велосипедизам при Град Скопје, на точаци да ја извозат Рута 1, особено делот по бул. Илинден, и самите да ја констатираат нејзината сегашна состојба, а и да ја предвидат идната (за 1 година) состојба на патеката. 

НаТочак како и секогаш стои на располагање на Градот за било каква помош, сугестии, предлози, идеи во насока на долгорочен развој на велосипедскиот сообраќај во нашиот град.

 

Со почит,

НаТочак                                        

7.07.2016, Скопје

 

ПРИЛОГ: Фотографии од велосипедската патека на бул. Илинден, правец исток-запад, потег од бул. 8 Септември до ул. Љубљанска. Фотографирани на 4.07.2016, два дена после последниот дожд.
НАПОМЕНА: Слични проблеми има и на други делови од патеката. На овој сегмент проблемот е најизразен и фотографиите служат само како илустрација.

Застојана вода со земја неколку дена после дожд.
Забележлива е повисоката кота на тревникот во однос на патеката

 

Вдлабнување и траги од валканата вода на асфалтот

 

Забележливо пропаднат асфалт

 

После исушувањето на водата останува земја во вдлабнувањето

 

Земјата која останува после секој дожд е поволна за растење на треви кои може дополнително да го разјадат асфалтот. Забележливо е од каде „се излева“ земја. Патеката е на пониска кота од тревникот.

 

Забележливо вдлабнување во асфалтот

Траги кои го отсликуваат вдлабнатиот дел од патеката кој е на пониско ниво од тревникот и од каде не може да се исцеди водата

 

Еден од поголемите вирови кој се задржува неколку дена после дожд

 

Read more »

Пријава на инфраструктурен проблем - прекин на велосипедска патека - спроти Систина

Изминатите години на различни места во градот се појавуваат прекини на велосипедски (и пешачки) сообраќај поради изведба на градежни работи. Сметаме дека треба да биде правило (особено на многу фреквентни локации) да се обезбедат привремени алтернативни патеки / мостови /премини за да се овозможи безбедно сообраќање додека траат градежните работи. 
Во очи на Критична маса #40 која е посветена на пристапноста на Кејот на Вардар за велосипеди, испративме две пријави до Град Скопје. 

-------------------------------

До:                         Град Скопје

Сектор за уредување и просторно планирање

Предмет: Пријава на инфраструктурен проблем: прекин на велосипедската патека на Кејот на Вардар спроти Систина

ПРИЈАВА

Почитувани,

Пред точно еден месец на кејот на Вардар во близина на мостот кај Александар Палас забележан е прекин на велосипедскиот сообраќај. Поставена беше табла на која пишуваше задолжително да се користат скалите на кои не постои рампа ни за туркање на велосипедот, а уште помалку за возење. 

После еден месец состојбата е следна:

И покрај импровизираниот знак, велосипедистите не ги користат скалите туку земјениот дел од кејот. Не е ни за очекување децата или други физички помалку спремни лица да ги подигаат велосипедите во раце. Не сите кои се дојдени на кеј можат да подигнуваат велосипеди, но имаат еднакво право да ги возат.

Пријавуваме непостоење на безбедно велосипедско поврзување при прекинот на велосипедската патека поради изградбата на мостот кон Систина.

Со оглед на тоа што градежните работи на оваа локација ќе продолжат уште барем година-две, бараме:

·         ако постои опасност по велосипедистите, градилиштето подобро да се обезбеди, огради и означи;

·         да се обезбедат рампи за движење на велосипедистите со соодветен наклон за возење (една за качување, една за спуштање, една кај мостот кај Александар Палас, а една после новиот  мост) со кои велосипедистите ќе можат да го заобиколат градилиштето, а кои би ги направиле овие два моста пристапни за велосипеди додека трае изведбата и во иднина штом завршат работите.

Велосипедската патека по левиот брег на реката Вардар завршува токму на ова место од другата страна на реката и правењето на мостот пристапен за велосипеди, би го направиле и самиот мост покорисен за граѓаните зашто би го поврзале завршетокот на патеката од левата страна со пофреквентната десна страна. Со тоа и левата страна би била покористена.

                                                                                                     

Ве молиме за најитно решавање на овој проблем за да се овозможи безбедно сообраќање во најкраток можен временски рок.

Апелираме на местата на кои се прекинуваат велосипедските и пешачките патеки поради изведба на градежни работи да се обезбедува алтернативна патека. Апелираме со соодветни правила за обезбедување алтернативен пристап да се оневозможи да се повторува проблемот во иднина.

Со почит,

Неформална група на велосипедисти НаТочак  
natochak@gmail.com

25.08.2014

Скопје

-------------------------------

Документот кој е испратен до град Скопје е достапен на линкот.

Read more »