Пријава на инфраструктурен проблем – уништена велосипедска патека поради работа со тешка машинерија

На 22.јули испративме пријава до Град Скопје и до ЈП Улици и патишта за уништување на велосипедската патека на Партизанска поради невнимателна работа со тешка машинерија.

Пријавата како .pdf документ е достапна на линкот, а како текст во продолжение. 

Подетален и посликовит опис на проблемот има во албумот на Facebook, достапен на овој линк. Албумот е објавен на 31. јули, откако 9 дена после пријавата, уништувањето на патеката продолжи.

-------------------------

До:                          Град Скопје
 
Сектор за уредување и просторно планирање
 
Предмет: Пријава на инфраструктурен проблем – уништена велосипедска патека поради работа со тешка машинерија
 
 
 
ПРИЈАВА
 
Почитувани,
 
На ден 22.07.2020 год. пријавуваме уништување на велосипедска патека од тешка машинерија, која моментално работи на бул. Партизански Одреди, од бул. Френклин Рузвелт до ул. Никола тесла. Сликите се од пред поранешно Симпо во Карпош 1.
 
Во прилог слики:

Бараме итен прекин на работата со тешка машинерија и санација на настанатите дупки, која освен ако не се копа целосно од почеток до крај на потегот на кој се работи, никогаш нема да може да се врати во првобитната состојба.

Понатаму, на овој потег е потребно да се направи заобиколување на автобуската постојка која е веднаш до местото на кое сега се работи. Предлагаме сега да се искористи можноста за изведување на потребното заобиколување и санација на уништениот асфалт на велосипедската патека.
 
 
 
Со почит,
Неформална група на велосипедисти НаТочак
natochak@gmail.com
22.07.2020
 
Скопје
*Овој документ е испратен во електронска форма до Град Скопје и ЈП Улици и Патишта.

Read more »

Допис за прекин на патеката на кејот на Вардар за мост на бул.АСНОМ

Денес, 23.03.2020 НаТочак испрати допис до Град Скопје во врска со прекинот на велосипедската патека на кејот на Вардар во општина Аеродром поради извршување на градежни работи за мостот на бул. АСНОМ, а без изведено заобиколување. Дописот е достапен во .pdf облик на следниот линк, а како текст во продолжение: --------------------------- Скопје, 23.03.2020
До: Град Скопје

Сектор за уредување и просторно планирање

Предмет: Пријава на инфраструктурен проблем – прекин на кејот за мост на бул. АСНОМ Почитувани,

По реакциите на многу граѓани до нас, би сакале да ве известиме за непочитување на точка 2.1.4 Воведување на обврска за задолжително обезбедување на алтернативни површини за пешачење и возење на велосипед при изведување на градежни работи на пешачки и велосипедски површини

од Планот за унапредување на велосипедски сообраќај кој Советот на Град Скопје го усвои во септември минатата година, при изведување на градежните работи за мостот на булевар АСНОМ.

Ова е извадок од Акцискиот план:

а целиот план е достапен на вашата веб-страница:

https://skopje.gov.mk/media/4370/predlog-plan-za-unapreduvanje-na-velosipedski-soobrakaj-2019-2021.pdf

Велосипедската (и пешачката) патека по кејот на Вардар се моментално целосно прекинати без обезбедување на алтернативни патеки (слика во прилог).

Тараби на кејот на Вардар при изведување на
градежните работи за мостот на булевар АСНОМ

Граѓаните од општина Аеродром кои го користат велосипедот како превозно средство според слободни проценки (а кои може лесно да се докажат доколку би имале мерачи на клучни локации) дури и повеќе го користат кејот за да стигнат до центар од булеварските патеки.

Ова е особено значајно во периодот на здравствената криза со брзината на ширење на Ковид-19 кога секој велосипедист е битен заради намалување на гужвата во јавниот превоз. Многу градови апелираат на поголемо користење на велосипедот кај оние граѓани кои можат да го прават тоа, за да се намалат гужвите во јавниот превоз. Некои градови (како Богота, н.з.) дури и обезбедуваат привремени велосипедски патеки. Нашиот град не смее да ги прекинува најактивните патеки било кога, а особено не среде ваква криза.

Во моментов граѓаните од Аеродром без никакво навремено известување за градежните работи, без никакви насоки како да заобиколат, се принудени да стигнат до самите тараби и да се враќаат назад до првите скали и да го носат велосипедот во раце, а не секој кој го користи велосипедот како превоз го може тоа. Не треба да ви посочуваме какво демотивирање е тоа и како долгорочно ќе се одрази на развојот на велосипедскиот сообраќај во нашиот град. 

Бараме според зацртаните планови на Градот, во овој и во сите идни проекти, да не смеат да се прекинат велосипедски патеки, да не смеат да започнат градежни работи од изведувачите додека навремено не се обезбеди известување со соодветна сигнализација за насоки на движење, како и изведено безбедно заобиколување.

Дополнително, во точка 2.2.2 од истиот план: 2.2.2.Изработка на план за унапредување и проширување на велосипедската мрежа во Скопје за периодот 2020 – 2021 

има потточка која гласи:  интегрирање на патеката по должината на реката Вардар преку рампи и мостови.

Очекуваме идниот мост покрај што е најавено дека ќе има велосипедски патеки, да има и поврзување со патеката по текот на Вардар со возливи рампи. 

Тие рампи можеше да се изградат пред изградбата на мостот и да послужат како возливи врски по текот на заобиколувањето и додека траат градежните работи. 

Во врска со тоа, би сакале да ве потсетиме и на точките 3 и 7 од Меморандумот за соработка кој НаТочак го потпиша со градоначалникот Петре Шилегов во 2017 година (тогаш кандидат):

3. Новата градска администрација се обврзува да вклучи задолжителни велосипедски простори и патеки во секое идно проектирање на нова улица, булевар или мост.

7. Итно деблокирање на постоечките велосипедски патеки кај плоштад Македонија, патеката на кејот на Вардар и Стоковна Куќа Мост, создавање на повеќе рампи за приклучување кон патеката на кејот како и нејзино продолжување накај Сарај и Јурумлери.

Целиот меморандум, можете да го прочитате тука: https://natochak.blogspot.com/2017/10/blog-post_15.html

Согласно официјалниот План за унапредување на велосипедски сообраќај на Град Скопје и согласно Меморандумот за соработка потпишан со градоначалникот Петре Шилегов, се чини дека сфатено е големото значење на патеката по кејот на Вардар за Скопје.

Бараме тоа да се покаже и во пракса.

Доколку се уште не се започнати градежните работи, бараме да се тргнат тарабите до моментот на обезбедување рампи и безбедно и означено заобиколување за велосипеди и пешаци.

Доколку се започнати градежните работи, бараме итно делување со поставување рампи за туркање на велосипеди и соодветна привремена сигнализација и насочување, а во догледно време (наредниве месеци) и подобро пофункционално решение со возливи рампи, бидејќи велосипедскиот сообраќај и кејот не смеат да страдаат во наредните години додека се вршат градежните работи како што беше случајот (и се уште е) со прекинот кој го направи мостот за Панорамското тркало и сите останати мостови во проектот Скопје 2014.

Исто така, со цел вакви проблеми да не се повторуваат во иднина, бараме да испитате како се издала дозвола за извршување на градежни работи врз функционална велосипедска патека, без да се изведе вакво заобиколување.

Со почит,

НаТочак

23.03.2020

Read more »

Барање за дислокација на контејнерите од велосипедските патеки

Откако поднесовме Пријава на инфраструктурниот проблем: локации на новите контејнери на 30. октомври 2019 по e-mail, со 5 прашања и не добивме одговор, после една недела, на 6.ноември 2019 година поднесовме Барање за дислокација на контејнерите по писмен пат до Архивата на Град Скопје. 
Како додаток на Барањето ја има и претходната Пријава. 

Барањето со архивски број е достапно на следниот линк како документ, а во продолжение и како текст.

-----------------------------

Скопје, 06.11.2019

До:                         Град Скопје

Сектор за уредување и просторно планирање

Предмет: Барање за дислокација на контејнерите од велосипедските патеки

Почитувани,

Помина повеќе од една недела од поставувањето на новите контејнери на неколку велосипедски патеки во градот.
Сметаме дека ова решение значително ги враќа чекор назад нашите и ваши заложби, Скопје да добие велосипедска инфраструктура која на граѓаните ќе им овозможи ефикасно, брзо и пред сѐ безбедно да го користат велосипедот како превозно средство со кое ќе сообраќаат низ градот.

Со поставување на контејнери на велосипедските патеки во голема мера се нарушува прегледноста на движење, движењето се пренасочува преку рабникот кој ја одделува велосипедската патека од тротоарот, како и дополнително ги доведува во конфликтни ситуации велосипедистите со пешаците кои одлагаат отпад во контејнерите, што ја загрозува и нивната безбедност.

НаТочак јасно и недвосмислено ги поддржува сите заложби на Градот, кои предвидуваат подобрување на управувањето со отпад, разубавување на градот и подобрување на квалитетот на живеење, но бараме тоа да биде стручно и долгорочно планирано.

НаТочак нема апсолутно ништо против новите контејнери како унапредено решение за управување отпад, но има конкретна забелешка на узурпирањето на велосипедските патеки како локација за поставување на истите.

Поради тоа бараме да се дислоцираат овие контејнери од велосипедската патека, како и да престанат да се поставуваат врз друга велосипедска инфраструктура.

Затоа го повикуваме Град Скопје уште еднаш да ја преиспита својата одлука и да најде решение кое ќе биде на задоволство на сите свои граѓани, вклучувајќи ги и оние кои се решиле своите автомобили да ги заменат со точак, како превозно средство.

Се надеваме дека ова барање ќе биде испочитувано во набрз рок и нема да има потреба да помине уште една недела во која пешаците и велосипедистите ќе бидат во конфликт.

Во продолжение го прикачуваме документот пратен до Градоначалникот и членови на Кабинетот на Градоначалникот и Координативното тело на 30.10.2019 и потсетуваме дека сѐ уште не се одговорени прашањата кои веруваме дека се од јавен интерес.

*Известуваме дека овој допис ќе го објавиме јавно, исто така и вашите одговори штом ги добиеме.

Благодарност за соработката и развојот на концептот Скопје Велоград,

НаТочак

неформално здружение за урбан велосипедизам

За подобро вело - Скопје

e-mail: natochak@gmail.com

blog: natochak.blogspot.com

FB: facebook.com/NaTochak

TW : twitter.com/NaTochak

Read more »

Пријава на инфраструктурен проблем – Локации на новите контејнери

НаТочак испрати допис до Град Скопје како реакција на новопоставените контејнери на главните велосипедски рути. Документот е достапен на линкот, а содржината исто така и во продолжение.

___________________

Скопје, 30.10.2019

До:                         Град Скопје

Сектор за планирање и уредување на просторот

Предмет: Пријава на инфраструктурен проблем – Локации на новите контејнери

Почитувани,

Со проектот Скопје Велоград во изминативе неколку години конечно видовме позитивни промени во урбаната мобилност во градот. Беше реконструирана дел од постоечката вело-инфаструктура, беше додадена нова и дел од просторот за пешаци и велосипеди беше ослободен и заштитен со столпчиња. Еден од најчесто посочуваните проблеми на патеките ослободени од возила, останаа фиксните пречки: лошо позиционирани семафори, билборди, како и лошиот дизајн на точките на среќавање со другиот сообраќај, автобуските постојки, местата каде пешаците чекаат на семафор и крстосниците. Во сите овие случаи, не поради другите учесници во сообраќајот, туку поради недоосмислените и неспроведени решенија, движењето со велосипед станува некомотно, од праволиниско, станува слаломско.

Поради тоа, во следната фаза кон унапредување на велосипедскиот сообраќај, овие слаби точки требаше да се решат, движењето со велосипед да стане уште подиректно и покомотно, а не да се креираат нови. Во Планот за унапредување на велосипедскиот сообраќај 2019-2021 стои: “Добрата и квалитетната инфраструктура за велосипедски сообраќај е клучна за зголемување на користењето на велосипедот. Мерките од оваа област треба да резултираат со насоки и стандарди за велосипедска инфраструктура, обезбедување на висококвалитетна, безбедна, комфорна и добро поврзана велосипедска мрежа“.

Во 2019 година, како дел од напорите за подобрување со управувањето со отпад, беа набавени нови, поголеми контејнери. Проблемот со оваа набавка се покажа веднаш штом тие контејнери беа поставени на „нивните“ локации.  Поради тоа што се статични, тие имаат функционална ограниченост, и мораат да се постават на локации лесно пристапни за камионите што ги празнат - што во случајов се токму главните велосипедски рути што беа неодамна реконструирани и ослободени. Нивната поставеност сега го намалува просторот за движење и предизвикува сериозни проблеми во мобилноста на пешаците, велосипедите, лицата со ограничена мобилност и лицата со инвалидитет (слики на стр. 3 и 4). Сето ова е спротивно на целите од Планот за унапредување на велосипедскиот сообраќај 2019-2021, укажува или на конфликти помеѓу различните плански документи при нивната реализација или на непочитување на стандарди, но и на недоволна комуникација меѓу надлежните сектори и лица.

За да се лоцираат причините за новонастанатата состојба, а со цел да се поттикне нејзиното решавање, ги имаме следните прашања:

1. Кое тело/сектор/лица одлучувале за набавката на контејнери, видот на контејнери што ќе се набавуваат и локациите каде што ќе се поставуваат?
2. Дали локациите на контејнерите се испланирани пред или после набавката? По кои критериуми се бирани? Дали може да цитирате релевантни одлуки, одобренија и документи? Дали е одобрен елаборат за поставување на урбана опрема и кој стои позади него, кој го изработил и кој го одобрил?
3. Кои стандарди за урбанистичко планирање и уредување на просторот се користени при изборот на локации на контејнерите, особено оние врз велосипедски патеки?
4. Дали пред да се донесе одлуката за локациите и типовите на контејнери се консултирани лица од Секторот за сообраќај, Секторот за урбанизам, СВР Скопје и други засегнати страни што работат на проектот „Скопје Велоград“ и кои?
5. Со оглед на тоа дека веќе има сериозни реакции од граѓаните, дали се планира ревизија на избраните локации? Доколку не се планира ревизија, дали за ваквото решение, кое што значително ја менува инфраструктурата и безбедноста во сообраќајот, се побарани и одобрени изменети сообраќајни проекти за булеварите и улиците каде што се поставени контејнерите?

Ви благодариме на одговорот.

 *Известуваме дека овој допис ќе го објавиме јавно, исто така и вашите одговори штом ги добиеме.

Благодарност за соработката и развојот на концептот Скопје Велоград,

НаТочак

неформално здружение за урбан велосипедизам

За подобро вело - Скопјe  

e-mail: natochak@gmail.com

blog: natochak.blogspot.com

FB: facebook.com/NaTochak

TW : twitter.com/NaTochak

слика 1

слика 2

слика 3

слика 4

                               

Read more »

Пријава на инфраструктурен проблем : мешани пешачко-велосипедски патеки долж Бул. Кочо Рацин

На 13.09.2017 до Координативното тело за урбан велосипедизам НаТочак упати допис во врска со почетокот на градежните работи на бул. Кочо Рацин.
За истиот булевар беше разговарано и усно, но НаТочак сакаше да остане запис во облик на пријава од официјалниот став.
Па еве го во продолжение како текст или како документ на линкот.
--------------------

До: Град Скопје
Координативно тело за урбан велосипедизам
Предмет: Пријава на инфраструктурен проблем мешани пешачко-велосипедски патеки долж Бул. Кочо Рацин

ПРИЈАВА

Почитувани,
Би сакале да изразиме загриженост и незадоволство во врска со градежните работи кои деновиве се извршуваат на бул. Кочо Рацин, поточно на тротоарите.
Реакцијата ни е малку задоцнета бидејќи за жал, повторно дознаваме за реконструкцијата од терен бидејќи не беше истакнат планот за реконструкција пред да започнат градежните работи. Независно од тоа, се надеваме дека ги земете нашите забелешки предвид.

Градежни работи на терен

Според она што можевме да го разбереме од сајтот на Град Скопје (линк до веста), со оваа реконструкција нема да се смени дизајнот на улицата, нема да добие посебни велосипедски патеки, туку постоечките тротоари чиј асфалт ќе се смени ќе станат мешани пешачко-велосипедски патеки.
Булеварот Кочо Рацин е дел од Големиот ринг кој го обиколува најцентралното подрачје на градот и како таков е многу важен за сите типови сообраќај, не само за автомобилскиот. Тој ги поврзува во прстен сите планирани велосипедски рути на исток, запад и север од центарот. Дури и според мапата на проектот Скопје вело-град, на оваа делница е покажано дека ќе се направи посебна велосипедска, а не пешачко-велосипедска патека (означено е со црвено, а не со сино).

мапа на Скопје велоград проектот

Имено, со овој допис сакаме да посочиме на можноста за поинакво решение на улицата.
Штом се вложуваат големи јавни средства, сметаме дека треба попатно да има и подобрување на решението, а не само промена на асфалтот.
Моментално булеварот има во секоја насока по 3 широки коловозни ленти (широки по 3.5 метри секоја, т.е. вкупно 10.5 метри) и една мешана пешачко-велосипедска патека широка 2.8 метри која минува низ автобуска постојка. За град кој претендира да се нарече вело-град и кој веруваме сака да го поттикне покрај возењето велосипед и пешачењето како здрав и незагадувачки начин на движење низ градот, ова не е добра слика и праведен сооднос на просторот и не соодветствува на заложбите.

Истовремено, на овој булевар се вози значително брзо токму поради големата ширина на лентите која не е соодветна за градски брзини до 50 km/h, туку поттикнува поголеми.
Докажано е дека дизајнот на улиците е силен фактор за безбедно или небезбедно однесување многу повеќе од бројките за брзински ограничувања на сообраќајните знаци. Според студија направена во Токио и Торонто, потесните ленти резултираат со неагресивно возење и со можност да се сопре навреме и да се избегне судир, и истовремено не влијаат на намалување на капацитетот на улицата за примање коли, напротив. Додека на пошироките ленти, возачите се чувствуваат комотно да го надминат ограничувањето и почесто се случуваат сообраќајни судири со последици.
Претпоставката дека пошироките ленти се побезбедни не важи за градска средина и тоа се потврдува со се' повеќе емпириски податоци. (референци 1, 2)

Затоа сметаме дека решение за двата проблеми:
1. брзото возење на автомобилите
2. непостоење на издвоени велосипедски и пешачки патеки
ќе биде стеснување на автомобилските ленти од 3.5 на 3 метри и добивање на 1.5 метар за велосипедска лента, наместо постојното решение со кое патеката треба да навлезе во зеленилото и сепак ќе биде од понизок стандард, т.е. мешана пешачко-велосипедска.
Со нашиот предлог нема ни да се намали капацитетот за примање на возила, туку само ќе се зголеми безбедноста на булеварот за сите учесници во сообраќајот.

Апелираме употребата на коловозни ленти со ширина од 3 метри, наместо 3 и пол метри да стане пракса во сите изградби на нови булевари и при реконструкција на постоечките. Просторот добиен со новата распределба (т.н. Road diet, патна диета), може да се користи за пешачки, велосипедски патеки или зеленило (намени кои недостасуваат и му се неопходни на градот, особено ако се стремиме тој да станува пријателски за велосипеди и пешаци) зависно од тоа што недостасува во контекстот.

Апелираме да се размисли и за специјализирање на најдесната од трите коловозни ленти за јавен превоз како во сите градови кои се залагаат за одржлив сообраќај.

Улиците во Скопје треба да се дизајнираат да бидат безбедни и со градски, а не со автопатски карактер.
Секоја реконструкција на било која улица треба да се искористи како шанса да се преосмисли дизајнот на улицата, да се направи побезбедна за сите учесници во сообраќајот, а не само да се смени асфалтот.

Со почит,
НаТочак

13.09.2017

Референци:
1. Линк до статија: “Лентите широки 3 метри се побезбедни и сепак имаат капацитет за многу возила“
https://www.citylab.com/solutions/2015/07/10-foot-traffic-lanes-are-saferand-still-move-plenty-of-cars/399761/
2. Линк до Препораките за ширина на ленти на Националната агенција за градски транспорт на Америка:
https://nacto.org/publication/urban-street-design-guide/street-design-elements/lane-width/

Read more »

Пријава на инфраструктурен проблем - понизок и пропаднат асфалт на велосипедска патека - бул. Илинден

НаТочак испрати пријава до Координативното тело за урбан велосипедизам при Град Скопје во врска со воочен проблем на Рута 1 од проектот “Скопје Велоград 2017“ - понизок и пропаднат асфалт. Се надеваме проблемот навремено ќе се санира со цел да се заштити патеката од натамошно оштетување. Исто така се надеваме дека овој апел ќе влијае да се пристапи со поголемо внимание при изведбата на останатите рути од проектот.
Документот кој е испратен до Координативното тело е достапен на линкот, а текстот од пријавата заедно со фотографиите ги има и во продолжение.
-----------------------------------

 

До: Град Скопје

Координативно тело за урбан велосипедизам

 

Предмет: Ревизија на Рута 1 од проектот ”Скопје Велоград 2017”

                 Проблем со понизок и пропаднат асфалт

 

 

Почитувани,

Ви се обраќаме во врска со еден проблем кој почна да се јавува по текот на Рута 1 од проектот “Скопје Велоград 2017“ и за кој стравуваме дека доколку навреме не се преземе нешто, ќе има сериозни последици по употребливоста на патеката.

Патеката се пушти во употреба и имаше многу пофалби од граѓаните, но со тек на време почнаа да се покажуваат дел од пропустите при изведбата. Имено, се работи за следното: 

Патеката на потегот од Општина Центар до ул. Љубљанска има 2 насоки поставени од јужната страна на бул. Илинден. Една насока запад-исток покрај коловозот и една насока исток-запад на внатрешната страна од зеленилото.

Патеката во насока запад-исток е главно со стар нереконструиран асфалт, од затекнатата велосипедска патека (на некои места многу брановиден), а патеката во насока исток-запад е нов асфалт кој беше рамен и многу пофалуван од велосипедистите поради глаткоста. 

За жал, оваа патека е изведена на исто ниво или под нивото на зеленилото (тревникот) и иако го има соодветниот наклон за исцедување кон него, поради пониската кота, создава редица проблеми кои почнаа да доаѓаат до израз после последните дождови:

-       и при мал дожд се собира вода во десетици вирови по текот на патеката

-       водата нема начин да истече зашто земјата е на повисока точка од патеката

-       водата тешко испарува бидејќи овој дел е цело време под сенки (исто така многу преферирани од велосипедистите во летните месеци)

-       долгото стоење на водата предизвикува натамошно слегнување на асфалтот и оформување на вдлабнатини кои со тек на време ќе собираат сè повеќе и повеќе вода.

-       поради слегнувањето на асфалтот многу веројатна е и појавата на пукнатини

-       кога водата конечно ќе се исуши останува земја на патеката која е подлога за растење на треви

-       на некои места од патеката веќе имаат изникнато треви кои можат сериозно да го разјадат асфалтот 

(На крајот на овој допис има посебен прилог со фотографии oд наведените проблеми)          

 

Со почесто чистење на патеката (после секој дожд) може да се ублажи проблемот.

Сепак, би замолиле за трајно решавање преку:

- симнување на нивото на почвата за неколку cm (онолку колку што е потребно за да биде пониско зеленилото од велосипедската патека) со цел при дождливо време водата од патеката да се исцедува во зеленилото, а на обратно, од зеленилото на патеката

- да се подигне нивото на патеката со нанесување на уште еден слој асфалт врз патеката.

- поставување на повисок рабник меѓу зеленилото и патеката може само да ги помогне горните решенија, но не веруваме дека може целосно да го реши проблемот.

Ја користиме оваа прилика и да апелираме да се посвети должното внимание при изведбата на останатите велосипедски патеки. Кога веќе се вложуваат средства и време, нека се посвети поголемо внимание околу квалитетот на изведба на патеката, и од надлежните инженери и од оние кои директно изведуваат, за да се направат нештата квалитетно и да бидат долготрајни, наместо да се санираат секоја година.

Можеби треба да се обрне внимание и на подобро тампонирање на подлогата.
 

Предлагаме членовите на координативното тело за урбан велосипедизам при Град Скопје, на точаци да ја извозат Рута 1, особено делот по бул. Илинден, и самите да ја констатираат нејзината сегашна состојба, а и да ја предвидат идната (за 1 година) состојба на патеката. 

НаТочак како и секогаш стои на располагање на Градот за било каква помош, сугестии, предлози, идеи во насока на долгорочен развој на велосипедскиот сообраќај во нашиот град.

 

Со почит,

НаТочак                                        

7.07.2016, Скопје

 

ПРИЛОГ: Фотографии од велосипедската патека на бул. Илинден, правец исток-запад, потег од бул. 8 Септември до ул. Љубљанска. Фотографирани на 4.07.2016, два дена после последниот дожд.
НАПОМЕНА: Слични проблеми има и на други делови од патеката. На овој сегмент проблемот е најизразен и фотографиите служат само како илустрација.

Застојана вода со земја неколку дена после дожд.
Забележлива е повисоката кота на тревникот во однос на патеката

 

Вдлабнување и траги од валканата вода на асфалтот

 

Забележливо пропаднат асфалт

 

После исушувањето на водата останува земја во вдлабнувањето

 

Земјата која останува после секој дожд е поволна за растење на треви кои може дополнително да го разјадат асфалтот. Забележливо е од каде „се излева“ земја. Патеката е на пониска кота од тревникот.

 

Забележливо вдлабнување во асфалтот

Траги кои го отсликуваат вдлабнатиот дел од патеката кој е на пониско ниво од тревникот и од каде не може да се исцеди водата

 

Еден од поголемите вирови кој се задржува неколку дена после дожд

 

Read more »