Роденденска изложба

Вчера на прозорите од Младинскиот културен центар беше поставена мала изложба на постерите од сите досегашни 13 критични маси.

Уште кога почнавме да ги правиме неформалните собирања на точакољупци, пролетта 2012 година, се појавија дизајнери кои доброволно дизајнираа постери. 

Подоцна со првата Критична маса го добивме и логото. Па нова верзија. Па оваа денешната. Дизајнерите и понатака имаа желба да придонесат за Критична маса, а тоа, иако непланирано, сосема се вклопуваше во филозофијата на ова движење. 

Па така решивме да продолжиме и натаму: со вклучување на што повеќе дизајнери во 'визуелниот идентитет' на месечните возења точак по скопските улици. 

Како што Критична маса е шарен придонес од многу ситни акции на многу луѓе, така и постерите: секој од различен автор, различни, уникатни, со свој белег, придонесуваат одекот на ова движење да стигне до што повеќе различни луѓе со различни стилови и вкусови.

Од името на секој што мрднал со прстот за нешто да се случи во ова неформално друштво, им благодариме многу на дизајнерите на 13-те постери досега, се извинуваме за преполните инбокси и најважно е дека без нив кругот немаше да сврти до тука!

Веруваме на обострано задоволство!

Стилот и ангажманот на Критична маса зависи од сите нас!

Среќни сме што цела година Критична маса баш ни е убава, во секој поглед! :)

Следуваат фотографии од изложбата и преглед на сите изложени постери.

Местото на мини- изложбата

Прв дел од постерите

Втор дел

Луѓе разгледуваат

Постерите и презентацијата од фотографии и видеа на платно

Изложбата позади. Напред масичката со налепниците.

И мала онлајн изложба на сите постери кои беа изложени вчера, почнувајќи од оној на кој беа претставени сите 12 рути извозени изминатава година. 

За подетален разглед на сите промотивни материјали изработени од дизајнерите за конкретната Критична маса, кликнете на линкот со нивното име.

Кои маала ги видовме годинава?
Сите 12 патеки од првата година Критична маса во Скопје

	КМ #1: Фросина Цонева Ивановиќ Точакољупци или На Точак, што да стои на постерот? Па и мапата баравме да ја стават, кутри дизајнери со почетници :)
	КМ #2: Графичко Око „Идејата ми дојде додека возев точак“ и слични почетнички занесувања.   Ама стварно ни доаѓаа со секоја нова критична маса :)
	КМ #3: Магдалена Дилевска И’ рековме дека треба да разговараме за дизајнот до 10ти јули, ни го прати завршен на 8ми.
	КМ #4: Ѓорѓи Јаневски Успешно вметна господин во дизајнот, иако не му го имавме кажано навреме слоганот.
	КМ #5: Тони Димитров Минатиот пат- господин, сега машка школска банда. Не сакаме да им се мешаме на дизајнерите, ама мораше да има девојче :)
	КМ #6: Мики Стефаноски Смислуваме тема за насочување на критиката кон неосветлените велосипедисти. Успева во дизајнот да ја искритикува и состојбата на патеките :)
	КМ #7: Ника Гавровска Му влезе на дизајнот мртва сериозна. Производ - дизајн на многумина омилен.
	КМ #8: Иван Петрушевски Едвај се најдовме, но комуникацијата потоа беше најлесна на свет. И новогодишни моменти и други јазици, се’ вклучено.
	КМ #9: Кирил Стоилков I drew a knight on a bike fighting a smoke monster. Your argument is invalid.
	КМ #10: Давор Пехчевски Да го извадам или да го ослободам... точакот? :) Ќе си почнам со своерачен цртеж, а вие мислете му ја за слоганот.
	КМ #11: Горан Костовски- Индог #CelebrateLife #НаТочак! А овие од колите заглавени нека пцујат :)
	КМ #12: Игор Делов Редефинирана тема и комуникација од 88 мејла. Ама се исплати :)
	КМ #13: Небојша Гелевски- Бане Побаравме дизајнер за КМ 13, ни донесе цела лабораторија. Лого па ич не побаравме, а го добивме :)

Во знак на благодарност постерите од изложбата им ги подаривме/ќе им ги подариме на нивните автори.

Read more »

Инфографик од анкетата „Точакољупци, не' има ли доволно?“

Минатата година во октомври спроведовме онлајн-анкета преку која сакавме да ги испитаме ставовите на точакољупците за ситуацијата со велосипедскиот сообраќај во Скопје и нивниот однос кон неа. 

Ни одговорија и граѓани од други градови чии одговори се вклучени во делот за Македонија.

Дополнителното текстуално објаснување на анкетата и анализата на текстуалните одговори ќе ги објавиме кон крајот на неделава.
Очи во очи годишнината сакавме да ги покажеме резултатите барем преку инфографиков.
Во Скопје има се' повеќе луѓе на точак!
Погледнете што најмногу ги поттикнува да возат точак оние сограѓани кои возат и што ним, како на редовни учесници во сообраќајот на точак, најмногу им пречи во градот.
Исто и зошто не возат оние кои не возат, а кои би возеле кога условите би биле подобри.
За да се омасови уште повеќе возењето на точак, одговорните мора да се позанимаваат со решавање на тие проблеми. 

А нам ни претстои нова година со активности во кои ќе ги истакнуваме и популаризираме.
Се надеваме на поддршка голема како и досега!

Скопје на точак, големо да растеш!

Се гледаме на роденденската Критична маса #13 утре во најголем број досега!

Инфографикот во поголема резолуција- линк.

Инфографикот со сликовито прикажување на резултатите од анкетата го изработи Зоран Инадески, му благодариме!

Им благодариме и на списанието Лице в лице  за неговото објавување и поддршката. 

Read more »

Извештај од работилницата: Запознај го точакот! Сподели- научи- поправи!

Точакот е едноставна машина, генијална зашто е едноставен склоп од мал број делови. Но сепак е машина, возило, превозно средство.

Треба да се познава и одржува за да не' служи добро и долго и да немаме проблеми.
Треба да биде здрав! :)

Едноставноста, пак, овозможува некои ситни поправки да ги направиме сами, без некое големо знаење или труд.
Сервисите за велосипеди некогаш се далеку или затворени и некогаш едноставно може да ви се случи дефект кога најмалку очекувате. 

Зошто да си скратите од задоволството да се довозите со точакот до саканата дестинација само поради една обична дупната гума кога може сами за 10-ина минути да ја залепите?

Некои точакољупци знаат како да ги направат овие поправки и што е уште поважно беа расположени да го споделат своето знаење и се одзваа на нашиот повик. 
Им покажаа и објаснија на присутните како да се справат во одредени ситуации и им направија основен „преглед на точаците“, интервенирајќи онаму каде што можеа. Во ретките случаи каде што се работеше за покрупни дефекти, ги упатија кон професионална работилница. 

На 14.04.2013 во периодот од 11:00 докај 15:30 се подруживме во парк и научивме да вадиме тркало и лепиме гума, да го враќаме назад тркалото :) Оваа операција делува многу сложено, но само додека не ја направите првиот пат. А после неколку пати веќе сте и спремни да подучувате други!
Научивме да одмастуваме и подмачкуваме ланец, да штелуваме брзини и кочници и поправивме по некое седиште, ѕвонче и педали.
Еве мал фото-преглед од работилницата:

DIY реклама на платото кај Фонтана

DIY реклама на прометно место на кеј

Се чекаше и ред за поправките

Но никој не остана неуслужен :)

Идеи вредни за споделување. Дефинитивно!                              

                                   

И девојки и момци засукаа ракави тој ден, тотално нешмизловски

За една ваква работилница пред се' се потребни луѓе со желба за споделување, но и некој основен алат :)

Го заштитивме платото со картони

И тркалата со весник кога подмачкувавме...

Учевме да се грижиме за синџирот

                                      

Прво одмастување на ѕвездите, па подмачкување на ланецот

Добар е, добар, не чкрипи веќе!

                         

Свети! :)

Ја вадиме гумата од тркалото со многу едноставен алат

Учиме да лепиме скинати гуми

Го местиме назад тркалото

Учиме да штелуваме кочници

Оваа беше проблематична! :)

Паралелизација- 3 тима работат истовремено :)

Поправено и седиштето на едно мало точаче

На децата им беше најинтересно сред точаците

Но и повозрасните кога се на свој погон се подмладуваат :)

И ние сме заљубени во нашите точаци :)

Белешки, некаде во втората половина од денот. Докрај бројките пораснаа уште малку.

Но не поправме само. Игравме и фризби и имавме кооперативно шанкче под сенка ;)

Се дружевме и поминавме прекрасно и корисно попладне.
Беше интервенирано врз 20-ина точаци, а на настанот не' посетија 50-ина граѓани со или без точаци, со потреба од интервенција или само од љубопитност.

Сакаме точаци и сакаме да споделуваме. 

Па веројатно во иднина ќе има и други слични дружби.
Во меѓувреме, доколку не сте го направиле пролетниот ремонт, време е да го однесете точакот на мајстор! За да имате поглатка и побезбедна возна сезона.
Се гледаме на скопските улици со синџири кои не чкрипат, кочници кои кочат и ѕвончиња кои ѕвонат!

Ѕрн- ѕрн!

Read more »

Извештај од Критична маса #11

Пролетта е во полн ек и улиците се полнат со точаци и повеќе од лани.
А ситуацијата со окупираните велосипедски патеки воопшто не се подобрува.

Во пресрет на „сезоната“, со Критична маса #11 на 27.03 и активностите околу неа го посочивме овој проблем: апсурдноста и опасноста на ситуацијата во која се доведени велосипедистите (исто и пешаците). 

Илустрирање на апсурдната ситуација, кога ќе се постави vice versa

Ни од властите, ни од своите сограѓани кои се движат со автомобил, тие не се третирани како учесници во сообраќајот, па патеките наменети за нивно движење се се' почесто претворани во легални или нелегални паркинзи, сеедно.

Credits to @medodimoski

Како една од најодговорните институции за ова прашање, ги исконтактиравме надлежните од МВР преку писмо во кое побаравме да помогнат да се почитуваат законите, а со тоа да се зголеми безбедноста на сите учесници во сообраќајот.

За да го популаризираме проблемот меѓу нашите сограѓани, направивме повик за собирање фотографии од непрописно паркирани возила. Албумот: За чие движење се предвидени велосипедските патеки? и покрај тоа што Критична маса #11 помина, е се' уште отворен за дополнување, како што и проблемот е се' уште актуелен.

Дополнително, преку флаери кои ги поставувавме на бришачите од лошо паркираните возила се обративме со пријателски тон кон возачите. Можеби и не знаеја овојпат, па да ги информираме :) 

Останатите пораки, тука. Благодарност до Горан Костовски- Индог за дизајнот на промотивните материјали за КМ 11!

постерот за КМ 11

Кога и ќе помислиме подобро, голем број од велосипедските патеки не се ни означени и дел од граѓаните не се свесни дека соодветната патека е велосипедска, а не пешачка. Што секако не ги ослободува од одговорност таму паркираните возачи.

Баш тој проблем со непостоењето на ознаки бил инспирација за група активисти со точаци со обичен стенсил и спреј да ги обележат патеките на некои од најгорливите локации во градот. Одговорните служби не треба многу да се потрудат и потрошат. 

Лесно е, ако се сака.

И конечно, и самото возење на Критична маса 11 беше посветена на тој проблем.
Околу 220-250 луѓе извозеа симболично по едни од најкритичните и најнебезбедни улици во Скопје за возење велосипед барајќи рамноправен третман во сообраќајот.

View Критична маса - Скопје на точак #11 in a larger map

Временските услови беа одлични, а ние бевме погласни од било кога!
Од некаде се појави полиција, но присуството на нивните возила (за жал не со велосипеди!) не влијаеше воопшто негативно на атмосферата. Напротив, бевме погласни од било кога!

Ечеше Скопје од свирки, вувузели и слеано завивање :)
Погледнете во видеата:

Почнавме од паркингот спроти Влада за кој дознавме дека се наплаќа и покрај тоа што окупира јавна површина- велосипедска патека:

Што се случува со пешачкото и велосипедското движење тука? Не постојат?

Немаше доволно место да не' собере на „паркингот“

Едно куче во корпа и едно што трчкаше не' дружеа на оваа КМ

И неколку мали дечиња со своите родители

Многу насмеани точакољупки

Ја окупираме Партизанска

Колони од точаци го пресекуваат бул. Климент Охридски. 

Интересно беше кога колоната се пресретна во двете насоки после Кружниот тек кај Католичка црква, на ул. Митрополит Теодосиј Гологанов.

Завршивме со подигнување на точаците во паркот Јане Сандански во Аеродром.

На крајната дестинација во кутијата за донации завршија ~2537 денари од учесниците.
Точакољупци и пол! :)Трошоците за оваа Критична маса беа вкупно1450 денари за печатењето на постерите и флаерите.

******Случувања по Критична маса #11******

На 10-ти април, пријатели на Facebook профилот на НаТочак не' информираа дека на Партизанска полицијата опоменувала непрописно паркирани возила. 

Звучеше предобро за да потрае, и за жал оттогаш речиси ништо не се променило.

Во програмите за избори почна срамежливо да се појавува зборот велосипед.
Чекаме промените да се појават и во стварноста :)

И продолжуваме да возиме и да посочуваме на проблемите!
Зашто веруваме дека добрите услови за возење точак, значат подобри услови за живеење во градот за сите!

Read more »