Инфографик од анкетата: Украдени точаци 2018

Благодарност до сите точакољупци кои одговорија на анкетата за украдени точаци.
Во периодот од 19-ти до 23-февруари на онлајн анкета одговорија дури 2006 испитаници. Браво!

Некои од поинтересните резултати од примарната анализа ги издвоивме во инфографикот на линкот или во продолжение под текстот.
Дополнително, ќе направиме подетални анализи и целосниот извештај ќе го објавиме наскоро, ова е само најава. 

П.С. Не заборавајте на Критична маса #70 “Имаш сериозна врска?“ која е посветена токму на оваа тема. Се гледаме во среда на 28-ми февруари. 

Read more »

Промотивни материјали за КМ #70: Имаш сериозна врска?

[дизајн: Александра Филипоска - Fitz]

Промотивните материјали од овој блог-пост може слободно да се споделуваат, печатат, да се лепат на соодветни локации во градот, да се користат во рамки на објави за настанот или како линкови.

Однапред ви благодариме на сите за помагањето да се прошири информацијата за Критична маса #70, која ја посветуваме на подигнување на свеста за проблемот со украдените точаци, а ја користиме и како уште еден потсетник да внимаваме каде и како го паркираме нашиот превоз!
На Александра ѝ благодариме што ни направи прекрасен топол дизајн за последниот зимски месец кој ја рефлектира љубовта и грижата кон нашиот миленик.

МАТЕРИЈАЛИ ЗА ПЕЧАТЕЊЕ

• Постер, верзија за печатење: линк (.jpg)

МАТЕРИЈАЛИ ЗА ВЕБ

постер, верзија за веб

Facebook cover (820 x 310) 

Facebook event cover (1920 x 1080)

Twitter cover

Банер 300x250px

Банер 500x500px

Банер 980x100px

Банер 990x80px

Read more »

Критична маса #70: „Имаш сериозна врска?“

Датум: среда, 28.02.2018

Почеток: 17:30, Плоштад Македонија
Крај: Депо на МВР

--------------------------------------------------------------------

Facebook настан: линк

Рута: линк

Промотивни материјали:  линк
Инфографик од анкета за украдени точаци: линк 

--------------------------------------------------------------------

постерот за КМ 70

Што претставува за тебе точакот?

Можеби за некои е заменливо парче метал и две гуми. Но за поголемиот дел од нас точакот е нешто повеќе од бездушен предмет. За некои од нас тој е сеќавање на нашето детство. За други тој е добро друштво за до работа или факултет.- За некои е здраво тело, а за некои е филозофија, борба за поубав град. За некои сето тоа заедно. И тие работи се врзани со конкретниот точак, со спомените креирани со него, средбите, љубовите, турите, критичните маси. Рачно осликаното ѕвонче, дизајнерската торбичка или довлечканата специјална корпа, багажникот со кој мајсторот долго се мачеше да го монтира...грижливо собираните налепници и неспретно направените гребаници, искривените калници. Твои си се, со нив ги љубиш улиците на градот.

Веројатно колку повеќе вртиме со педалите, толку повеќе градиме поврзаност со нашиот точак и токму затоа боли кога ќе ни го украдат. Затоа што не украле само парче метал и гуми, туку украле и дел од нас.

Тогаш дали имате сериозна врска? Врска која нема да дозволи вашиот точак да биде украден.

Оваа Критична маса, 70-та по ред ја посветуваме на безбедноста на нашите точаци. Ќе возиме под слоганот „Имаш сериозна врска?“, затоа што секоја „сериозна врска“ со нашиот точак повлекува и сериозна грижа за него во периодот помеѓу две возења и сериозно добар систем на заклучување. Факт е дека велосипедите се лесна жетва за крадците, а за жал бројот на најдени и вратени точаци по кражба е сѐ уште мал.

Секогаш кога треба да го оставите некаде велосипедот, потсетете се на овие златни совети:

-Секогаш заклучувајте го точакот за објект кој е цврст, не може да се уништи лесно и е неподвижен.
-Велосипедот заклучувајте го за неговата рамка задолжително и дополнително за едно тркало доколку сте во можност, а никогаш само за тркалото.
-Заклучувајте го на места каде има голема фреквенција на луѓе
-Внимавајте на локацијата - таа секогаш треба да биде осветлено место и доколку има можност, заклучете го на место во домет на камера за надзор
-Одберете систем за заклучување кој е побезбеден (од најбезбедно до најнебезбедно): U-lock, лептир (folding lock), ланец/синџир (chain lock), сајла (cable lock)

И не заборавајте, не постои 100% безбедна комбинација која ќе го заштити вашиот велосипед од кражба.

Ако треба да го оставите велосипедот на подолго време, тоа нека биде во затворен или добро контролиран простор.
За градско возење и чести и долги оставања на отворено користете поевтин градски велосипед.

Во среда, на последниот ден од последниот зимски месец (28 февруари) ќе возиме за да ја покренеме свеста за проблемот со украдените велосипеди, да се едуцираме како да не останеме без нашиот миленик на две тркала, да го повикаме МВР да воведе регистар за велосипеди, како и да покаже посериозен и поодговорен пристап кон пријавените случаи. Исто така, повикуваме и секој на кој му бил украден велосипедот, да пријавува веднаш во полиција, бидејќи иако статистиката е демотивирачка, дел од велосипедите кои се украдени, сепак го наоѓаат својот пат назад до сопственикот. 
--------------------------------------------------------------------
Негуваме сериозна врска не само со нашите точаци, туку и со скопските улици.
Па се гледаме во среда, на плоштад Македонија, во 17.30 часот да ја извозиме заедно 70-тата јубилејна Критична маса.

Ќе возиме по следнава рута:

Се гледаме во среда, на точак!

--------------------------------------------------------------------

Критична маса е неформален велосипедски собир кој се случува во над 300 градови во светот.

Нема лидери, нема формална организација, само група на свесни луѓе кои сакаат подобар вело-град.
Од мај 2012-та се случува еднаш месечно и во нашето Скопје!
Возиме секоја последна среда во месецот по различна рута и со различна тема.

Критична маса во Скопје е самоодржлив, саморегулиран и самофинансиран месечен собир на урбаните велосипедисти кој зависи од придонесот на секој учесник, пред сѐ од неговото појавување на собирот и покажување бројност („Нѐ има, земете нѐ предвид“), од активната грижа настанот да помине во најдобар ред, а потоа и од донациите за промотивните материјали, волонтерскиот придонес во: осмислувањето на настанот, неговата промоција и се разбира во креативната страна на возењата. До овој момент, скопјани 69 пати возеа масовно по скопските улици, на 69 различни теми поврзани со урбаниот велосипедизам.
Да ги освоиме по 70-ти пат улиците со нашите точаци, активно, ангажирано, свесно, заедно, со полни срца!

Приклучи се! Ангажирај се!

Може да нé има повеќе! Скопје може да стане подобар град!

-------------------------------------------------------------- 

Read more »

Анкета за украдени точаци

Во пресрет на Критична маса #70 која ќе биде посветена на проблемот со безбедноста на велосипедите, НаТочак подготви анкета која има цел да собере информации од велосипедската заедница за отсликување на моменталната ситуација и ставовите на луѓето во врска со украдените точаци.

Без разлика дали некогаш ти бил украден точакот или не, оваа анкета е за тебе!
Нема да ти одземе повеќе од 5 минути, а одговорите нам ни се многу значајни.

Анкетата може да ја одговориш тука, а потоа можеш да ја споделиш и со твоите пријатели, бидејќи секој одговор е важен.

Благодариме!

Read more »

Winter bike to work day - Skopje #4

Датум: петок, 9.02.2018
Почеток: 0:00
Крај: 23:59
Место: Цело Скопје, цел свет!
--------------------------------------------------------------------

Facebook настан: линк
Интернационален сајт: линк
Мапа на локали кои имаат поволности за посетителите на точак: линк
---------------------------------------------------------------------

И оваа година се придружуваме на интернационалниот Winter Bike to Work Day. Запомнете го денот - 9ти февруари. 

Дотогаш имате доволно време да ги извадите велосипедите од гаража, да ја избришете прашината, да ги напумпате гумите и да ги ставите во погон многу порано отколку обично. Пробивањето на комфорната зона е процес кој што најмногу се мотивира преку личен пример. Бидете пример за другите дека нема лошо време, туку само лоша опрема.

Што треба да направите? Регистрирајте се на сајтот https://winterbiketoworkday.org/ и обврзете се дека тој ден ќе движите НаТочак до вашата секојдневна дестинација, синхронизирано заедно со мноогу луѓе низ цел свет.
А кога ќе дојде D-Day постирајте ваши слики со интернационалниот хаштаг #WinterBikeToWorkDay или #WinterBikeToSchoolDay и/или локалниот: #WBTWDSkopje (за работа) или #WBTSDSkopje (за образование) и пофалете се за Вашиот транспортен избор тој ден.

Ги повикуваме кафулињата, баровите, рестораните, продавниците за велосипедска опрема и сите останати деловни субјекти да се вклучат во славењето на овој ден преку овозможување на најразлични поволности, попусти и награди за оние кои ќе дојдат на точак до нивните локали и ќе купат нивен производ/услуга. Користете го просторот на Facebook настанот за промоција на Вашите Вело-поволности или испраќајте ни на мејл (natochak@gmail.com) или во порака на Facebook страницата на НаТочак и ние ќе ги објавуваме Вашите промоции.

Ги повикуваме и сите јавни институции, министерства, општини, јавни претпријатија, училишта, факултети, но и сите приватни компании да се придружат на оваа иницијатива, да бидат креативни и да ги мотивираат своите вработени и ученици/студенти на овој ден да дојдат на работа/на школо на точак.
Секој може да направи свој настан, свои промотивни материјали, свои понуди, свои награди за своите посетители / вработени/ ученици кои ќе пристигнат на точак тој ден.
Иницијативата е интернационална и отворена, придружете се! 

Да го ставиме Скопје на светската вело-мапа! 

P.S. На светската ранг-листа по бројот на пријавени поединци кои на сајтот winterbiketoworkday.org се обврзале дека во петок, 9-ти февруари ќе одат на работа со точак, Скопје се наоѓа на 5-то место (последно проверено во 13:30, 7.02.2018)

На следнава мапа ги има локалите кои даваат поддршка на овој ден со топол пречек за сите точакољупци ;) Да ги посетиме, на точак. 

Read more »