Приказна 4: Ни викаат дека возењето велосипед е спорт. За нас е и транспорт!

4. Ни викаат дека возењето велосипед е спорт. За нас е и транспорт!

Серија акции: Четири приказни кои можат да бидат велосипедски

За целата идеја: тука

Приказна 1: Ни викаат: Нема место за велосипедски ленти! 
Приказна 2: Ни викаат: Имате велосипедски патеки!
Приказна 3: Ни викаат дека Скопје ќе биде Велоград! 
Приказна 4: Ни викаат дека возењето велосипед е спорт. За нас е и транспорт!

-----------------

Веројатно првата асоцијација за велосипедската патека долж кејот на Вардар е дека таа е за спорт. Но ние мислиме дека може да биде и транспорт! Зелен транспорт! Вело транспорт!

Велосипедската патека долж кејот на реката Вардар е најдолгата непрекината велосипедска патека во Скопје без крстосници, без семафори. Таа е најбрзиот начин на движење со велосипед. Таа рута може да биде нашиот ВЕЛОСИПЕДСКИ АВТОПАТ, нашата “обиколница“.

Ако има доволно рампи(приклучоци) и добра поврзаност со останатиот дел од велосипедската инфраструктура, луѓето ќе се вклучуваат на оваа патека за да ги избегнат сите раскрсници и досадни чекања на секој семафор и ќе се исклучуваат од неа онаму каде што имаат поврзаност со друга велосипедска патека која води до точката која е нивна крајна цел. Вардар може да го поврзе градот исток-запад, но и север-југ!

Затоа бараме:

-патеката по текот на Вардар да се интегрира со останатите велосипедски рути од проектот Скопје Велоград преку краци за спојување во мрежа, преку возливи рампи со благ наклон, велосипедски патеки на новопланираните мостови, преку нови пешачко-велосипедски мостови.
*Во град кој претендира да биде Велоград не смее да има нов мост без велосипедски патеки и возливи велосипедски рампи кон кејот.
-да се доуредат и ослободат деловите каде патеката има прекин (деценискиот прекин во Центар поради градежните работи и неуредениот дел на Вардар меѓу Карпош и Ѓорче, со што Скопје ќе се поврзе за пешачење, трчање и точак по цела своја должина од Сарај до Лисиче! Мерачки, нели?

За Скопје Велоград ни треба по Вардар велопат!

-----------------

Благодарност до:

📷 Vase Amanito за фотографиите од акцијата

🎀 UG Ulice za bicikliste за платното

Ова е четвртата од #4ПриказниКоиМожатДаБидатВелосипедски

-----------------

Објави на социјални медиуми за приказна 4:

Facebook пост: линк

Twitter: линк

Instagram: линк 

Read more »

Приказна 3: Ни викаат дека Скопје ќе биде Велоград!

3. Ни викаат дека Скопје ќе биде Велоград! 

Серија акции: Четири приказни кои можат да бидат велосипедски

За целата идеја: тука

Приказна 1: Ни викаат: Нема место за велосипедски ленти! 
Приказна 2: Ни викаат: Имате велосипедски патеки!
Приказна 3: Ни викаат дека Скопје ќе биде Велоград! 
Приказна 4: Ни викаат дека возењето велосипед е спорт. За нас е и транспорт!

-----------------
А се асфалтираат патеки на кои најважен е квантитетот, а не квалитетот. Брановиден асфалт, тешко совладливи рабници и различни физички пречки во профилот на велосипедската или пешачката патека. Ако не може бандерите, билбордите и знаците да ги ставиме на сред коловозна лента каде што возат оние со колите, зошто може истите да ги поставиме на патеките на кои треба да возат оние со точаците???

Во плановите треба внимателно да се дизајнираат специјални зони за урбана опрема, кои исто како што не се коловозна лента, така нема да се сметаат ни за пешачка, ни за велосипедска патека.

Скопје Велоград не е само асфалтирање на метри должни. Скопје Велоград (треба да) е визија дизајнирана од урбанисти, планери, архитекти, сообраќајни инженери вградена во сите нивоа на планирањето на градот.

Сакаме велосипедска инфраструктура чиј дизајн ќе мотивира. Велосипедска инфраструктура која ќе ги повикува луѓето да ја користат.
Сакаме велосипедска инфраструктура која ќе нуди безбедност и комоција. Која ќе биде не само за најхрабрите и највештите, туку и за најмладите и за највозрасните, за поплашливите и за помалку вештите, за СИТЕ граѓани.

Само така Скопје ќе стане Велоград.

-----------------
Благодарност до:
📷 Vase Amanito за фотографиите од акцијата
🎀 UG Ulice za bicikliste за платното

Ова е третата од #4ПриказниКоиМожатДаБидатВелосипедски
-----------------
Објави на социјални медиуми за приказна 3:
Facebook пост: линк
Twitter: линк
Instagram: линк 

Read more »

Приказна 2: Ни викаат: Имате велосипедски патеки!

2. Ни викаат: Имате велосипедски патеки!

Серија акции: Четири приказни кои можат да бидат велосипедски

За целата идеја: тука

Приказна 1: Ни викаат: Нема место за велосипедски ленти! 
Приказна 2: Ни викаат: Имате велосипедски патеки!
Приказна 3: Ни викаат дека Скопје ќе биде Велоград! 
Приказна 4: Ни викаат дека возењето велосипед е спорт. За нас е и транспорт!

-----------------

Колку улици можете да наброите на кои редовно гледате дека велосипедската патека/лента е окупирана од застанати или паркирани коли?
Тука не зборуваме за инцидентно паркирање на место каде многу ретко се случува тоа. Тука зборуваме за места на кои тоа е константен проблем. Тука зборуваме за секојдневие. Кога и да поминете на тие места секогаш има застанати или паркирани коли, чии “актери“ во секојдневна рутина, без посебен страв од казна, ниту пак грижа дека загрозуваат нечија безбедност, застануваат, паркираат или возат на велосипедската лента. Да, да, и возат. Дури и преминуваат преку пешачки и велосипедски премини заедно со пешаците и велосипедистите.

Недостатокот на страв од казна и сообраќајната (не)култура е резултат на нефункционирањето на институциите. Истите луѓе во други средини демонстрираат сосем друга култура. Таму знаат и да попешачат 5-10 мин од регулираниот паркинг.
Затоа јавно повикуваме: Министерството за внатрешни работи да воведе ред. Јавно повикуваме доколку паркирањето е проблем од помал интерес за МВР да се воведе локална полиција/комунални редари кои ќе можат лесно да казнуваат и без да мора да дојде пајак со цел да станат поефикасни и да има поголем ефект врз општото однесување. Јавно повикуваме да се изнајде начин и пријавите од граѓаните да имаат тежина во еден нов начин на воведување ред.

 

-----------------
Благодарност до:
📷 Vase Amanito за фотографиите од акцијата
🎀 UG Ulice za bicikliste за платното
🧩колажот е направен со фотографии од социјални медиуми

Ова е втората од #4ПриказниКоиМожатДаБидатВелосипедски

-----------------

Објави на социјални медиуми за приказна 2:

Facebook пост: линк

Twitter: линк

Instagram: линк

Read more »

Приказна 1: Ни викаат: Нема место за велосипедски ленти!

1. Ни викаат: Нема место за велосипедски ленти!

Серија акции: Четири приказни кои можат да бидат велосипедски

За целата идеја: тука

Приказна 1: Ни викаат: Нема место за велосипедски ленти! 
Приказна 2: Ни викаат: Имате велосипедски патеки!
Приказна 3: Ни викаат дека Скопје ќе биде Велоград! 
Приказна 4: Ни викаат дека возењето велосипед е спорт. За нас е и транспорт!

-----------------

Зошто да нема место за велосипедски ленти, а низ градот има многу коловозни ленти кои секогаш се блокирани од коли со изговор “се враќам за 5 минути“, “само да завршам работа“, “чекам некого“?
Пред кафичи само да пијат кафе, пред трафики само да купат цигари, пред обложувалници само да уплатат ливче, пред банкомати само да извадат пари...

Како тоа градот секогаш има место за цели резервирани ленти кои се блокирани од паркирани коли, а нема место за велосипедски ленти на кои ќе се одвива велосипедски сообраќај?

Зелен сообраќај. Ведар сообраќај.
Луѓе со насмевки, луѓе што размислуваат за помал метеж, поевтин транспорт, почист град, подобро здравје...

Наместо МРТВИ ЛЕНТИ ни требаат ВЕЛОСИПЕДСКИ ЛЕНТИ на кои ќе се одвива ЖИВ велосипедски сообраќај!

Место има насекаде низ градот. Треба само поинаков поглед.

-----------------

Благодарност до:
📷 Vase Amanito за фотографиите од акцијата
🎀 UG Ulice za bicikliste за платното

Ова е првата од #4ПриказниКоиМожатДаБидатВелосипедски

-----------------
Објави на социјални медиуми за приказна 1:

Facebook пост: линк

Twitter: линк

Instagram: линк

Read more »

Прашања и коментари за проектот за улица Орце Николов

Во врска со објавата од Општина Центар на проектот за улица Орце Николов (https://www.centar.gov.mk/?page_id=7181) и отворениот повик за коментари, испративме листа на прашања и коментари до Општина Центар на 12.февруари 2019 година

Почитувана г-а Белчева Андреевка и одговорните лица за проектот за ул.Орце Николов,

Ја поздравуваме иницијативноста на Општина Центар да биде првата општина во Скопје со велосипедска инфраструктура на улиците во своја надлежност и прва општина која спроведува Зона 30 на ваков практичен начин. 

За поздрав е велосипедската лента/патека по Орце Николов, но и конекторите кон Илинденска, во една насока на калдрмата пред општина Центар и во обратна насока на улицата Наум Наумовски-Борче.
Се надеваме дека другите општини ќе го следат примерот. 

Од прилогот кој можевме да го видиме (цртеж во основа во ситен размер) можевме да заклучиме дека:
1. Се мислело на сите категории на учесници во сообраќајот, но и на дрвјата, проектантите барале решенија, правеле компромиси и нашле решение што ги опфаќа сите и тоа е за голем поздрав.
Она што би сакале да го добиеме се само дополнителни информации кои недостигаа во презентацијата на проектот во медиумите(разбирливо) и во цртежот кој го добивме.

2. Во документот недостасуваат пресеци, димензии за широчини на коловозните ленти, проодните патеки за пешаци и велосипедските ленти. Особено се битни да се искотираат и прикажат во пресек во најтесните и најризичните делови. Се надеваме дека и нив ќе ги добиеме.
3. Бидејќи се планирани засеци во тротоарите за паркирање на возила, се поставува прашањето дали ќе се засекуваат постојните тротоари или целосно ќе се реконструираат?
4. Бидејќи во дел од опфатот, велосипедските патеки се на ниво на тротоар со пешаците, се поставува прашањето дали ќе има промени во материјализацијата на тротоарот во делот за велосипеди? 

5. Дали покрај позициите на дрвјата, водено е сметка и за други потенцијални физички пречки: бандери, улично осветлување, контејнери?

6. Каква ќе биде материјализацијата на издигнувањата на крстосниците? Апелираме на поквалитетна изведба со оглед на искуствата со “пропаѓање“ на ваквите издигнувања во Капиштец и населба Пролет. Секако, ги поздравуваме како најефикасно решение за смирување на брзината.
7. Што ќе се случува со велосипедските ленти во зоните на издигнување? Во однос на кота на движење и во однос на материјали?
8. Дали е испланирано заштитно растојание за отворање на врата од автомобил, особено во случајот кога паркирањето возила е преку велосипедската патека?
9. Иако не ни се омилени физичките пречки, факт е дека јавниот простор мора да се заштити, ако не со ревносно казнување, тогаш со физички пречки. Дали е предвидена некаква заштита од паркирање на тротоарите и на лентите?

Согледуваме и потенцијални “закани“ по спроведливоста на проектот:

1. Тераси од кафулиња и ресторани
Вака како што е направен проектот, на делот каде што велосипедската патека е на тротоарот, паралелно со пешачката, за да нема конфликт на пешаци со точаци, веројатно по цела должина тротоарот треба да биде чист. Односно по целата должина на тротоарот да нема ни едно столче и масичка од кафичи и кафани. Поради ова се потребни димензиите на патеките. Можеби поради ова, ќе треба да се забрани поставување на тераси по Орце Николов за проектот да се спроведе како што треба. Во спротивно сите пешаци ќе бидат на велосипедска.  

2. Паркирање на велосипедска лента

Очекувано е паркирање на велосипедска лента, во случајот кога велосипедската лента е на коловозот, особено во случаите каде треба да се паркира во засеците. Од примерот со ул. Раде Кончар (Радњанска - Боемска 2 во делот зад Архитектонски факултет), може да се увиди што не' очекува и во овој случај, освен ако не се преземат навремено мерки.
На возачите им е полесно да паркираат косо, па претпоставуваме дека и во овој случај би го правеле истото со што велосипедската лента би се претворила во паркинг. Овој ризик мора да го имаме на ум и општината да воспостави ред преку соработка со МВР или сопствени редари.

Дополнително на сите прашања, би сакале да дадеме и една мала сугестија за велосипедскиот крак пред Општина Центар, инспирирана од Копенхаген каде практикуваат елегантен пристап кога велосипеди треба да преминат преку калдрмисана површина. Не ја асфалтираат, туку со цел ем да се зачува историскиот амбиент на калдрмата, ем да се добие порамна површина за велосипедските тркала, употребуваат порамни парчиња камен.

Со почит,
НаТочак

Read more »