Извештај од Критична маса #11

Пролетта е во полн ек и улиците се полнат со точаци и повеќе од лани.
А ситуацијата со окупираните велосипедски патеки воопшто не се подобрува.

Во пресрет на „сезоната“, со Критична маса #11 на 27.03 и активностите околу неа го посочивме овој проблем: апсурдноста и опасноста на ситуацијата во која се доведени велосипедистите (исто и пешаците). 

Илустрирање на апсурдната ситуација, кога ќе се постави vice versa

Ни од властите, ни од своите сограѓани кои се движат со автомобил, тие не се третирани како учесници во сообраќајот, па патеките наменети за нивно движење се се' почесто претворани во легални или нелегални паркинзи, сеедно.

Credits to @medodimoski

Како една од најодговорните институции за ова прашање, ги исконтактиравме надлежните од МВР преку писмо во кое побаравме да помогнат да се почитуваат законите, а со тоа да се зголеми безбедноста на сите учесници во сообраќајот.

За да го популаризираме проблемот меѓу нашите сограѓани, направивме повик за собирање фотографии од непрописно паркирани возила. Албумот: За чие движење се предвидени велосипедските патеки? и покрај тоа што Критична маса #11 помина, е се' уште отворен за дополнување, како што и проблемот е се' уште актуелен.

Дополнително, преку флаери кои ги поставувавме на бришачите од лошо паркираните возила се обративме со пријателски тон кон возачите. Можеби и не знаеја овојпат, па да ги информираме :) 

Останатите пораки, тука. Благодарност до Горан Костовски- Индог за дизајнот на промотивните материјали за КМ 11!

постерот за КМ 11

Кога и ќе помислиме подобро, голем број од велосипедските патеки не се ни означени и дел од граѓаните не се свесни дека соодветната патека е велосипедска, а не пешачка. Што секако не ги ослободува од одговорност таму паркираните возачи.

Баш тој проблем со непостоењето на ознаки бил инспирација за група активисти со точаци со обичен стенсил и спреј да ги обележат патеките на некои од најгорливите локации во градот. Одговорните служби не треба многу да се потрудат и потрошат. 

Лесно е, ако се сака.

И конечно, и самото возење на Критична маса 11 беше посветена на тој проблем.
Околу 220-250 луѓе извозеа симболично по едни од најкритичните и најнебезбедни улици во Скопје за возење велосипед барајќи рамноправен третман во сообраќајот.

View Критична маса - Скопје на точак #11 in a larger map

Временските услови беа одлични, а ние бевме погласни од било кога!
Од некаде се појави полиција, но присуството на нивните возила (за жал не со велосипеди!) не влијаеше воопшто негативно на атмосферата. Напротив, бевме погласни од било кога!

Ечеше Скопје од свирки, вувузели и слеано завивање :)
Погледнете во видеата:

Почнавме од паркингот спроти Влада за кој дознавме дека се наплаќа и покрај тоа што окупира јавна површина- велосипедска патека:

Што се случува со пешачкото и велосипедското движење тука? Не постојат?

Немаше доволно место да не' собере на „паркингот“

Едно куче во корпа и едно што трчкаше не' дружеа на оваа КМ

И неколку мали дечиња со своите родители

Многу насмеани точакољупки

Ја окупираме Партизанска

Колони од точаци го пресекуваат бул. Климент Охридски. 

Интересно беше кога колоната се пресретна во двете насоки после Кружниот тек кај Католичка црква, на ул. Митрополит Теодосиј Гологанов.

Завршивме со подигнување на точаците во паркот Јане Сандански во Аеродром.

На крајната дестинација во кутијата за донации завршија ~2537 денари од учесниците.
Точакољупци и пол! :)Трошоците за оваа Критична маса беа вкупно1450 денари за печатењето на постерите и флаерите.

******Случувања по Критична маса #11******

На 10-ти април, пријатели на Facebook профилот на НаТочак не' информираа дека на Партизанска полицијата опоменувала непрописно паркирани возила. 

Звучеше предобро за да потрае, и за жал оттогаш речиси ништо не се променило.

Во програмите за избори почна срамежливо да се појавува зборот велосипед.
Чекаме промените да се појават и во стварноста :)

И продолжуваме да возиме и да посочуваме на проблемите!
Зашто веруваме дека добрите услови за возење точак, значат подобри услови за живеење во градот за сите!

Read more »

Зелените транспаренти од Критична маса #9

На Критична маса #9 (линк) возевме со следните транспаренти закачени на нас или на нашите точаци. 
Загадувањето беше најстрашно во јануари, но пораките не губат од актуелност и во овој дел од годината:

Read more »

Критична маса #12- Запознај го точакот, запознај го градот!

Датум: 24.04.2013
Време: 17:30
Место на чекање: плоштад Македонија

Промотивни материјали: линк.
Facebook настан: линк.
Рута: линк.

постерот за КМ 12

Ова е точак. Се знаете? 
Точакот е генијална машина. 
Точакот функционира на твој погон, енергијата му ја даваш ти. 
Точакот е едноставен склоп од мал број делови кој може да те одведе на многу интересни патувања на едноставен начин. 
Точакот е едноставно решение на многу од градските проблеми.
Точак значи среќа, здравје, чист воздух, помалку гужва, помалку бучава, поопуштен град, независност, слобода.

Ова околу тебе е Скопје. Се знаете?
Скопје е загаден, има гужва, Скопје бучи, Скопје е напнат и зависен од проавтомобилски политики и стереотипи.

Но Скопје има одлични предиспозиции за да може да стане добар вело-град.
Може да стане подобар град, воопшто.
И градот функционира на твој погон и енергијата му ја даваш ти!

Ајде на точак заедно низ Скопје, на резапознавање.
Од точак е секогаш поинаку, поинтимно, поблиско, позумирано, лице во лице.
Убавините и фалинките полесно се забележуваат и поинтензивно се чувствуваат.

Дојди на Критична маса 12 да заокружиме 12 возења љубов кон точакот и улиците на Скопје!

Во среда возиме по следната рута низ нов (за критична маса) дел од градот:


View Критична маса - Скопје на точак #12 in a larger map

*Бидете особено внимателни на угорниците/удолниците.
*Секој учесник вози на своја одговорност.

Read more »

До Тетово, низ Тетово и назад. Како поминавме низ 3 видеа.

На повикот за возење заедно до Тетово каде ја поддржавме со присуство првата Критична маса на тетовчани, се одзваа триесетина скопјани. 
Се чекавме на 2 локации во Скопје и тргнавме по стариот пат Скопје- Тетово.
Патот воопшто не беше напорен. Имаше доста луѓе кои за првпат возеа на подолга рута или за првпат вон град и немаа апсолутно никаков проблем да ја извозат релацијата во еден ист ден во двете насоки!
Одлично искуство низ убави предели кое го препорачуваме! 

Еве како поминавме во насока од Скопје кон Тетово: 



Стигнавме во Тетово саат и пол пред почетокот на КМ, тамам малку да одмориме.
Временските услови беа идеални, сончево беше речиси цело време. Тетовчани- расположени за возење точак (дел и за ролерки :)). Дојдоа околу 70-ина. 
Состојбата на улиците, пак, далеку од идеална: автомобили паркирани насекаде, хаос поголем и од тој во Скопје. Не се почитуваат ни автомобилски ленти, а велосипедски се веројатно нешто на кое ретко кој помислил. Но мора од некаде да се почне. А се чини, Критична маса Тетово почна мноогу добро.
Погледнете го видеото од првата КМ во Тетово:

Извозевме полека и дисциплинирано, возачите на коли беа дури и потрпеливи од скопските, а граѓаните не' поздравуваа со аплауз.

Тетовчани одлично се снајдоа, секоја чест! Им посакуваме уште многу многу критични маси и уште многу нови граѓани на точак секој ден!

Ако сте од Тетово или се затекнете во Тетово (или намерно отидете ;-)) придружете се на  КМ Тетово втората сабота, секој месец.

После убавото искуство на КМ 1 Тетово и дружењето со тетовчани после тоа, точаците под нас и накај 17:00 полетавме за Скопје. Возењето во оваа насока беше доста побрзо од возењето кон Тетово заради удолниците. Сепак, малку не' задржаа дупнување на гума и слични мали проблемчиња, но лесно и солидарно ги решивме и стигнавме во Скопје пред да се стемни. 

Што повеќе да се каже, освен дека посакуваме повеќе вакви убави денови во годината, повеќе убави настани во секој град и повеќе градови со своја КМ.

До следниот ;) ...

Read more »

Критична маса #11- Велосипедските патеки на велосипедистите!

Датум: 27.03.2013
Време: 17:30 Место на чекање: спроти Влада на РМ, на платото окупирано со автомобили

Промотивни материјали: линк.
Facebook настан: линк.
Рута: линк.

постерот за Критична маса 11

Пролет е, се забележуваат се' повеќе велосипедисти по улиците, што е за радување, но останува неодговорено прашањето: каде и како да се движиме?

Велосипедски патеки- многу малку и лошо одржувани, а згора на тоа- и окупирани од возила. (линк до фотогалерија)

Паркираните возила на патеките како проблем се на врвот на листата на нешта кои им пречат на велосипедистите при движењето низ Скопје, според анкетата спроведена од наТочак минатата година.

Приморани сме да се симнуваме на коловоз (па да се враќаме назад, па пак да се симнуваме), на места неопределени за тоа, меѓу возила во движење, со што е загрозена безбедноста на сите!
Има и сограѓани на кои им 'рѓосуваат точаците во гаражите токму поради овој проблем! 

Проблемот е повеќеслоен (од културата на возачите преку работата на сообраќајните служби до планирањето на градот) но се сведува на едно: пешаците и велосипедистите не се перципирани како (рамноправни) учесници во сообраќајот, туку како некој кој „го собира, ќе помине“.

Погледнете во видеово како изгледа возењето на точак и пешачењето низ еден од најнехуманите потези во Скопје: од ул. Даме Груев до ул. Рузвелтова по должината на  бул. Партизански одреди во обете насоки. 

 
За многумина е нормално што возачите „се снаоѓаат“ со паркинг место и паркираат најблиску можно до крајната дестинација без притоа да водат сметка дека им го блокираат патот на пешаците и велосипедистите, придонесуваат во општиот хаос и загрозуваат нечиј живот. 

Доколку за некого таквото паркирање е нормално, тогаш во сликава не би требало да забележи ништо чудно.

Илустрирање на апсурдната ситуација, кога ќе се постави vice versa

Како што е апсурдно да има велосипеди на коловозот, апсурдно е и да има возила на патеките. Принципот е ист. И пешаците и велосипедистите сообраќаат и мора да им се ослободат патеките за движење, пред се' за подобрување на општата безбедност. Потоа и заради попријатно чувствување во тие улоги и поголемо практикување на тие типови сообраќај наспроти палењето на фаворизираниот автомобил и на мали дистанци. 

една од 11-те пораки кои деновиве завршија на неодговорно паркираните возила

НаТочак им се обрати преку флаери на возачите на неодговорно паркираните возила низ градот, а ќе се обрати и до одговорните служби во МВР да преземат нешто за велосипедските патеки (како што името им налага) да бидат слободни за движење на велосипедистите!

Не бараме ништо специјално, слободното и безбедно движење е наше право.

Во среда Критична маса 11 ќе помине низ улици каде патеките се редовно окупирани со возила. 

View Критична маса - Скопје на точак #11 in a larger map

Без разлика дали возите редовно точак или не, дојдете на еден круг убаво возење заедно низ Скопје, во знак на поддршка на велосипедскиот како важен и рамноправен дел од сообраќајот!

Скопје може да стане подобар град!

Read more »

Извештај од КМ#10 - 27.02.2013

Го извадивте ли точакот од гаража? :)

Веќе е пролет и секое одложување значи помалку време за уживање оваа година. 
Зимата заврши, а пролетва е совршена. 
Некои од нас возат и во текот на цела зима, а некои се одзваа на повикот на Критична маса #10 и ја отпочнаа порано сезоната. Целта на КМ #10 беше токму тоа. 

Му благодариме на Давор Пехчевски чиј дизајн добро го долови повикот за ослободување на точаците и сопствените комфорни граници.
Џинглот на ТикТак, пак, си поигра со февруарската нота на повикот ;)
КМ #10 (и општо Критична маса) се промовираше и преку видеото „На улица, #naTochak“ кое го прикажавме премиерно на настанот Engage. 

Попладнето во последната среда во февруари температурата беше солидна (~10С), дувкаше ветер што малку не' успоруваше, но не врнеше како што многумина очекуваа. А на 150-ина учесници им беше сеедно. Дојдоа спремни да возат во секакви услови! 

Се собравме на платото меѓу гаражата од Влада (во која во догледна иднина се надеваме ќе се паркираат велосипедите на вработените функционери) и големите мачки на мостот Гоце Делчев. Пригодно, февруарски!

Собирањето на стартната точка кога уште беше светло.

Во возењето се моткаа меѓу нас неколку балони...

Точаците се современите коњи кои ти даваат чувство на летање низ градот :)  И плус се на сопствен погон!

На ова возење истраживме нови улички во градот...

Кружните текови во секојдневиото ни се тешки за снаоѓање, не знаеш дали да се однесуваш како автомобил или пешак...
Но затоа ни се многу интересни на Критична маса! 

Извозивме по рутата низ Дебар Маало, Карпош I, II, III, IV, Влае, Ѓорче Петров и Хром. За првпат завршивме на спортските игралишта во Влае на кејот на Вардар.


View Критична маса - Скопје на точак #10 in a larger map

Оние кои стигнаа до целта можеа да си земат беџ во една од двете различни големини.

Беџовите беа изработени благодарение на донациите кои завршуваат во кутијата за донации после возењата. 

                                     
За КМ #10 беа потрошени севкупно 3340 денари за постерите, флаерите и беџовите, а во кутијата за донации завршија 2211 денари. Благодариме на придонесот!
И благодариме за уште една прекрасна Критична маса!

Возењето помина во најдобар ред, групата се саморегулираше подобро од било кога! Чувството да возиш во таква група е неописливо убаво! Окупиравме со мали отстапки само една лента од коловозот, се грижевме едни за други и имаше доста доброволци кои љубезно ги замолуваа возачите на автомобили да бидат трпеливи ако требаше да не' почекаат за да поминеме. Секоја чест, точакољупци!
Како што ни се релаксирани и глатки видеово и улиците за автомобили по кои возиме, такви да ни бидат и патеките за точаци! Без борби со рабници.

Возењето го завршивме со подигнување на точаците:

Дружењето продолжи во кафуле во Порта Влае во кое (отпосле сфативме!) имаше часовник во облик на велосипед.

Во Порта Влае нема паркинзи за велосипеди па ги окупиравме оградата и светилките :)

Се гледаме на Критична маса #11 и се гледаме по скопските улици оваа пролет во уште поголем број! 

Ѕрн, ѕрн!

Read more »

Од интернет на улица: „На улица #naTochak"

„Ние сме На Точак.
Возиме во Скопје.
Критична маса е неформален велосипедски настан кој се организира во над 300 градови во светот. Критична маса во Скопје е почеток на трансформација на условите во кои се користи велосипедот како превозно средство за секој ден.“



Така започнува приказната раскажана во видеото  „На улица #naTochak" кое вчера премиерно се прикажа на конференцијата за социјални медиуми и активизам Engage.

Благодарност до организаторите кои ни ја дадоа можноста да ја претставиме Критична маса- Скопје на овој настан. А во контекст на темата на настанот, да ја претставиме и можноста да се стигне од коментари на интернет на одредена тема до реално движење кое и понатака се служи со социјалните медиуми, преку примерот со Критична маса. 

Видеото го проследија околу 300 учесници присутни во публика и уште неколку стотини во живо преку интернет. 
Се надеваме дека дел од нив ќе ги видиме во среда, на 27.02.2013, на 10-тата по ред Критична маса. За почеток да свртат едно кругче на точак со нас. Не треба повеќе :)

Не ги забораваме ни постерите и флаерите како начин на промоција на возењата :)
Залепивме десетина постери и поделивме стотина флаери за КМ #10 за време на конференцијата.

Приказната од бината во МКЦ ја раскажа еден точак кој си го пронајде местото на Критична маса и по скопските улици, место во гаража :)

И овие десетина точаци тој ден не беа 'заробени', туку довозија до паркинзите пред МКЦ. Дел од учесниците на конференцијата се одзваа на повикот (уште подобро ако и онака си планираа) и дојдоа на настанот на точак. 

На крајот на видеото присутните точакољупци ѕвонеа со ѕвончињата демонтирани од точаците и создадоа уште поубава атмосфера. 

Нека ѕвони Скопје повеќе оваа пролет! 

Еве некои од реакциите на твитер за видеото:

Како едно видео пробива веднаш до луѓето. Се родија нови точакољубци веднаш по гледањето. #EngageMk #NaTochak
— Martin Stojanovski (@martincco) February 23, 2013

#engagemk точак што зборува супер :)) браво за видевцето за #NaTochak !!!
— Sandra (@alexhris) February 23, 2013

Значи премногу уживав гледајќи го видеото од #NaTochak - најнајпозитивна иницијатива што се родила во градов. #EngageMk
— Martin Stojanovski (@martincco) February 23, 2013

#наточак филмче #win #engagemk twitter.com/banekoma/statu…
— Neb. Gelevski - Bane (@banekoma) February 23, 2013

Прекраснотии #NaTochak! Браво! #engagemk
— Ива(@NotSocialMedia) February 23, 2013

Фасцинирана од видеото #natochak #engagemk
— Marija Matovska (@MarijaMatovska) February 23, 2013

Ја сум не у ред или некако емотивно беше видеото #НаТочак? #engagemk
— Симоната (@Simona_Simche) February 23, 2013

Инијиатива #НаТочак во секој град! Не само во Скопје! #EngageMK
— Абреално Апсурден (@nojo90) February 23, 2013

Па, кој град е следен? :)

Read more »

Критична маса #10 - Извади го точакот од гаража!

Датум: 27.02.2013
Време: 17:30 Место на чекање: помеѓу гаражата од Влада и големата мачка на мостот Гоце Делчев 
Поглед на почетниот дел од патеката и местото за чекање. Тука за Критична маса - Скопје на точак #10 на поголема мапа.

Промотивни материјали: линк.
Facebook настан: линк Со оваа Критична маса упатуваме повик да не се чекаат идеални услови, како инфраструктурни, така и временски, за да се извади точакот и да се вози. Градот ќе ја стави темата повисоко на дневен ред кога ќе не' има повеќе. 
А во однос на времето, свртете едно кругче со нас за проба, ќе видите дека е ок!

Еве го повикот:

***

Се сеќавате каков вело-бум имаше минатата пролет?
Бројот на луѓе кои го избираат точакот како превозно средство расте од година во година и оваа пролет ќе не’ има уште повеќе, како што и зимава имаше повеќе од лани.
Условите за возење точак во Скопје не се нешто мотивирачки, но сообраќајните гужви, зголемувањето на цената на горивата, поголемата еколошка свест, тенденциите кон поздрав начин на живеење и сфаќањето дека точак е супер превозно средство си го прават своето.
Иако ги посакуваме, не ни се чекаат идеални услови за да возиме!
Ни се вози! :)

Возењето точак секојдневно е славење на животот, славење на чистиот воздух, на слободното движење, на погонот на сопственото тело, на посебните ќошиња на градот и на љубовта кон неговите улици!

А Критична маса е славење на сето тоа, но заедно!
И битка за подобар град во која се оди чекор понапред со секој нов велосипедист!

Ајде да се множиме!

Понесете балони, понесете миленичиња, деца, дечковци, девојки....вашите пријатели, луѓе кои ги сакате!
Февруари е, месец е за љубов!
Поттикнете ги да извозат еден круг со нас.
Нека ја откријат повторно магијата на возењето велосипед!
Скоро и да нема човек кој не знае да вози велосипед!
А и да не знае, лесно ќе научи и уште полесно ќе се заљуби во тоа!

Многу од нас имаат по некој кутар заклучен и можеби зарѓан велосипед во гаража кој чека да биде ослободен.
Скопје има улици кои чекаат да бидат преплавени со точаци и радост!
А ние имаме желба да создаваме таков град!
Местото на велосипедската инфраструктура е повисоко на дневен ред!
Местото на точакот се улиците!
Ослободете го!
Извадете го од гаража!

Да ја прошириме комфорната зона и да ги притиснеме сопствените граници!
А скоро и да нема зима. Мачките одамна завршија работа. 
Мириса на пролет!
Нека биде велосипедска!

***

***Секој учесник вози на своја одговорност.

Завршуваме со подигнување на точаците на спортските игралишта во Влае, а дружењето ќе продолжи во некое локално кафуле. Се гледаме во среда! Ѕрн- ѕрн!

Поглед на делот низ Влае и Хром, заедно со целта. Тука за Критична маса - Скопје на точак #10 на поголема мапа

Read more »